Harold's Hotel, Yoyi's Pastries nakaipsot

CEBU, Philippines — Mikabkab og 30 puntos si Burnong Endrina aron pangulohan ang kadaogan sa Harold's Hotel batok sa Angel Mary Pawnshop, 104-93 sa FYA Basketball Tournament Season 22 Pastrano's Special Chicharon Cup 2018 niadtong Domingo didto sa Vicente Sotto gym sa Punta Princesa, Dakbayan sa Sugbo.

Si Endrina miwilik sab og walo ka assists ug mikabya og upat ka steals nga igo na kaayo alang kaniya aron ilhon nga 'best player of the game'.

Ang Harold's Hotel ni Arnel Trinidad nakakuha sab og igong suporta gikan nilang Jade Ursal ug Ryan Arches nga mitampo'g 19 puntos matag usa. Si Jobert Barro miamot og 12 puntos sa 2-1 nga Harold's Hotel nga nakasungasong sa daghang mga pagsulay.

Alkansi og singko puntos ang Harold's Hotel human sa tulo ka kuwarter, 67-72, apan mi-rally sila sa fourth period aron maangkon ang kutas nga kadaogan.

Gipangulohan unta ni team manager McLain Alkuino ang iyang koponan dihang miantog siya  og 29 puntos, apan nakawang ang iyang paningkamot kay Angel Mary Pawnshop naremati man sa ikaduhang higayon  sud sa tulo ka duwa.

Si Ryan Villaver mitimbre og 20 puntos, samtang si Albert Encarguez mitikdol og 15 puntos sa Angel Mary Pawnshop.

Sa main game, ang Yoyi's Pastries & Desserts miposte sab og 2-1 nga baraha pinaagi sa pagpilde sa Ejay & Ejean Sportswear, 76-67.

Si Jao Rabadon maoy napiling 'best player of the game' human mibagnos og 28 puntos, milangkat og siyam ka rebounds ug tulo ka assists aron pangulohan ang Yoyi's Pastries & Desserts ni Ahlmark Albarracin. Ikaduhang topscorer sa Yoyi's Pastries mao si Reyboy Caballes nga miduslit og 16 puntos.

Ang Ejay & Ejean Sportswear ni Noel Medalle gipangulohan ni Jas Sydiongco nga mipabuto og 22 puntos, gisundan nilang Toper Marata ug Wako Dacayana nga parehong mikadlit og 11 puntos.

Ang Ejay & Ejean Sportswear gipaabot nga mamawi karong adlawa dihang ilang sangkaon ang Baran Brothers sa alas-7 sa gabii.

Sa ikaduhang duwa, magsangka ang Harold's Hotel ug ang Z&G Pro Audio sa alas-8:30 sa gabii.

Puntos matag usa

Unang duwa:

HAROLD'S Hotel (104) – Endrina 30, Ursal 19, Arches 19, Barro 12, Cabañez 8, Jumantoc 7, Celestial 7, R. Dacayana 2.

ANGEL Mary Pawnshop (93) – Alkuino 29, Villaver 20,  A. Encarguez 15, Laurente 8, Rara 7, Rama 6, Masongsong 4, K. Cabreros 2, Montillero 2.

Ikaduhang duwa:

YOYI'S Pastries (76) – Rabadon 28, Caballes 16, B. Aglipa 9, Albarracin 7, J. Aglipa 6, Hanginon 6, Enriquez 2, Salvador 2.

EJAY & Ejean (67) – Sydiongco 22, Marata 11, W. Dacayana 11, N. Medalle 9, AJ Abella 6, R. Tabares 4, Sabijon 2, J. Enriquez 2. (BANAT NEWS)