CEPCA 28th anniversary tournament gikatakda karong oktubre 20-21
CEBU, Philippines – Andam na ang tanan alang sa Boy 'Chessmoso' Pestaño Memorial Open Chess Team Tournament 2018 karong Oktubre 20-21 diha sa Barracks Chess Club nga anaa mahimutang sa ikaupat nga andana sa Robinsons Galleria Cebu.
Gipasiugdahan kini sa Cebu Executives and Professionals Chess Association (CEPCA) pagdugang og lamas sa ika-28 nila nga anibersaryo.
Si tournament director Jun Olis nagkanayon nga 25 na ka teams ang nakapalista, apan gipaabot nila nga ang numero molapas pa sa 30 gumikan kay bukas pa man ang rehistrasyon hangtod sa alas-12 sa udto karong Sabado, Oktubre 20.
Gipaluyohan sa Jemar Engineering Services, Celjem Construction and Development Corporation, Handuraw, Salon de Rose ug Hale Manna, ang duha ka adlaw nga torneyo magsubay og 7-round Swiss system format.
Dunay pagtugot gikan sa National Chess Federation of the Philippines, matag team langkuban og tulo ka players nga rated o unrated, apan kinahanglan nga duna sila'y average NCFP rating nga 2000. Kadtong mga unrated players awtomatik nga hatagan og rating nga 1800.
Dul-an sa P75,000 nga ganting salapi ang iapud-apod ngadto sa mga mananaog diin ang makampiyon mobulsa og P25,000.
Ang tanang mga duwa ubos sa superbisyon ni tournament chairman ug CEPCA President Engr. Jerry Maratas inabagan ni Jun Olis, chief arbiter Marvin Ruelan ug sa iyang mga miyembro nga sila si Engr. John Velarde, FA Edward de la Torre ug Engr. Bob Inocian.
Ang entry fee nagkantidad og P600 sa all-kiddies ug all-ladies, ug P1,500 sa regular teams. Mahimong magparehistro sa Barrack Chess Club o sa Ayala Chess Center.
Alang sa dugang detalye, kadtong mga interesado mahimong motawag nilang Ruel Hortelano (0942-2722354), Marvin Ruelan (0932-7152411) ug Jun Olis (0942-4641565).
- Latest