Z&G Pro Audio nagsolo na sa liderato sa FYA Season 22
CEBU, Philippines — Nagsolo na karon sa liderato ang Z&G Pro Audio human makaipsot uban ang 86-83 nga kadaogan batok sa CRV sa kulbahinam nilang duwa sa FBA Basketball Tournament Season 22 Pastrano's Special Chicharon Cup 2018 niadtong Domingo didto sa Atillo Gym sa Labangon, Dakbayan sa Sugbo.
Si Dexter Caballero mihimo og triple-double sa iyang 20 puntos, 11 ka rebounds, 10 ka rebounds ug lima ka steals nga nakahimo kaniya nga best player of the game. Apan ang topscorer sa Z&G Pro Audio mao si Dave Caballes sa naglagubo niyang 22 puntos.
Sila si Rommel Laput ug Macky Macachor mitampo'g 14 ug 11 puntos matag usa sa Z&G Pro Audio.
Naglisud ang Z&G Pro Audio sa sayong bahin sa duwa resulta sa ilang pagkalubong og 12 puntos, 13-25 sa first quarter. Nakabawibawi sila sa second period ug ilang nakan-an ang labaw ngadto na lang sa dos puntos sa halftime, 35-37.
Naglami ang duwa dihang nagsinukliay sa ilang opensa ang duha ka kampo hangtod nga naangkon sa Z&G Pro Audio ang tres puntos nga kadaogan.
Ang Z&G Pro Audio nilang Dave Natividad ug Macky Macachor mao na lang ang bugtong team nga wala pa mapilde sa duha nila ka duwa.
Ang CRV ni Christian Roy Villacastin gipangulohan ni Keir dela Peña nga mipabuhagay og 28 puntos, apan naanugon lang kay ang iyang team nakatilaw sa ikaduhang sunod-sunod nga pilde. Laing nakahimo og double figures sa 0-2 nga CRV mao si Emman Reubal sa iyang 16 puntos, gisundan ni Boyet Demol nga adunay 11 puntos.
Sa laing aksiyon, ang Island Hot Wings milubong sa EJ & Ejean Sportswear sa iskor nga 81-69.
Si Daniel Enriquez mikulit og triple-double aron pangulohan ang Island Hot Wings ni Junrey Arreglo. Si Enriquez miburak og 26 puntos, milangkat og 15 ka rebounds ug 10 ka assists sa kadaogan.
Nakatampo sab og dako si Ranel Patalita nga mikamada og 15 puntos.
Nangulo sa EJ & Ejean ni Noel Medalle mao silang Toper Marata ug Juvineil Enriquez nga nagkumboya'g 30 puntos.
Ang Island Hot Wings ug EJ & Ejean pareho na karong nagbitbit og 1-1 nga baraha.
Puntos Matag Usa
Unang duwa:
Z&G Pro Audio (86) – Caballes 22, Caballero 20, Laput 14, Macachor 11, Quintos 7, Dechosa 6, Tolentino 6.
CRV (83) – Dela Peña 28, Reubal 16, Demol 11, Ancla 8, Lumagbas 8, Sanchez 6, Silvano 6.
Ikaduhang duwa:
ISLAND Hot Wings (81) – Enriquez 26, Patalita 15, Flores 9, Arreglo 8, Laud 8, Ensong 7, Sy 4, E. Noquillo 2, Arias 2.
EJ & Ejean (69) – Marata 16, J. Enriquez 14, Sabijon 8, A. Abella 8, Dacayana 5, R. Tabares 5, N. Medalle 4, Labrador 4, AJ Abella 3, Demol 2. (BANAT NEWS)
- Latest