Severino ibinigay sa Pinas ang ika-3 ginto

2018 Asian Para Games

MANILA, Philippines — Umakyat na sa tatlong ginto ang nakamit ng Pilipinas sa 2018 Asian Para Games na ginaganap sa Jakarta, Indonesia.

Ito ay matapos pagharian ni chess master Sander Severino ang men’s B1 individual event nang makalikom ito ng 5.5 puntos mula sa apat na panalo at tatlong draws.

Ginapi ni Severino sina Sinaga Suhardi ng Indonesia sa first round, Firdaus Maksum ng Indonesia sa second round, Kutwal Shashikant Appaso ng India sa third round at kababayang si Rom Jasper Belarmino sa fourth round.

Nakasiguro naman ito ng draw kina Soltanov Serik ng Kazakhstan sa fifth round, Sutikno Sutikno ng Indonesia sa sixth round at Kuchibhotla Venkata Krishna ng India sa final round.

Nagkasya sa pilak si Maksum habang nakatanso naman si Belarmino.

Parehong may 5.0 puntos sina Maksum at Belarmino ngunit mas mataas ang tiebreak points ng Indonesian para masiguro ang No. 2 spot.

Nagdagdag ng isang pilak si Menandro Redor sa men’s B2-B3 individual category matapos magtala ng 5.0 puntos sa pitong rounds habang nakatanso sa parehong kategorya si Arman Subaste sa nalikom nitong 4.5 puntos.

Sa kabuuan nakalikom na ang Pilipinas ng tatlong ginto, anim na pilak at anim na tanso.

Nakahirit pa ng pilak na medalya si Ernie Gawilan sa men's 100m freestyle (S7) event – ang kanyang ikatlong medalya matapos makaginto sa 200m individual medley at tanso sa 50m freestyle.

Umani naman ng pilak si Rio Paralympics bronze medallist Josephine Medina sa women’s singles TT8 ng table tennis event.