Melindo bigong agawin ang titulo kay Shiro
MANILA, Philippines — Ginamit ni Japanese light flyweight titlist Ken Shiro ang kanyang diskarte para talunin si Filipino challenger Milan Melindo.
Binigo ni Shiro si Melindo via seventh-round TKO para sa kanyang ikaapat na sunod na pagdedepensa sa hawak na World Boxing Council light flyweight crown noong Linggo ng gabi sa Yokohama Arena sa Japan.
Ito ang unang pagkakataon na hindi natapos ni Melindo ang laban sa kanyang 13-year professional career.
Hangad sana ng tubong Cagayan De Oro City na makamit ang kanyang ikalawang world boxing title.
Una niyang nakuha ang International Boxing Federation light flyweight title via first-round KO victory laban kay Japanese Akira Yaegashi noong Mayo ng 2017.
Naisuko ni Melindo ang IBF crown kay Japanese WBA title-holder Ryoichi Taguchi via unanimous decision sa kanilang unification match sa bisperas ng Bagong Taon.
Naging bentahe ni Shiro (14-0-0, 8 KOs) ang mahahaba niyang galamay para talunin si Melindo (37-4-0, 13 KOs).
Isinandal ng 26-anyos na si Shiro ang 30-anyos na si Melindo sa lubid mula sa kanyang mabigat na right hand sa gitna ng seventh round.
Pinuntirya ng Japanese ang kaliwang mata ni Melindo na nakita na niyang pumutok at dumudugo bago pansamantalang ihinto ng ringside physician ang laban.
Iniutos ng ringside physician kay referee Laurence Cole na itigil ang nasabing laban sa 2:47 minuto ng seventh round dahil sa sugat sa kaliwang mata ni Melindo.
- Latest