Cebuana bowler miangkon og luna sa World Cup

CEBU, Philippines — Nakab-ot sa Sugboanang bowler nga si Alexis Sy ang iyang damgo nga makapakita og aksiyon sa World Cup.

Kini human gisakmit sa 26-anyos nga BPI corporate banking employee ang korona sa women's division sa Bowling World Cup national finals niadtong weekend.

Gipukan ni Sy si Dyan Coronacion, 196-180 ug 232-178 aron labnihon ang korona. Mokuyog uban ni Sy ngadto sa prestihiyosong World Cup  si men's champion Merwin Tan.

Parehong sakop sa Philippine team sa Jakarta Asian Games niadtong Agosto, sila si Sy ug Tan nagtinguha og mas dako nga dungog sa dihang morepresentar na sab sila sa nasud sa 54th Bowling World Cup karong Nobiyembre 4-11 didto sa Sam's Town sa Las Vegas.

"I'm so happy," matud pa ni Sy. "I did not expect to overcome the tough opposition because I had short preparation after returning from the Asian Games. But mom's arrival from Cebu last Thursday inspired me in the finals."

Si Sy ikatulo lamang sa semis, apan nakasud sa finals human gibuntog si Lara Posadas. (BANAT NEWS)