Ateneo giniba ang La Salle

Laro Ngayon(Smart Araneta Coliseum)

2 p.m. UP vs. NU (M)

4 p.m. ADU vs FEU (M)

MANILA, Philippines — Nagparamdam ang nag­dedepensang Ateneo Blue Eagles sa seryosong asam na back-to-back title matapos tambakan ang De La Salle Green Archers, 71-55, kahapon sa pagpa­patuloy ng Season 81 UAAP men’s basketball tour­nament sa Mall of Asia Arena sa Pasay City.

Mula sa pitong puntos na bentahe sa first half, lumobo ito sa pinakamala­king 18 puntos, 66-48, mula sa three-point play ni Angelo Kouame kay Kib Mon­talbo sa huling 2:11 mi­nuto sa fourth period.

Sinamantala rin ng Blue Eagles ang 27 turnovers ng 80th season runner-up na Green Archers na kanilang na-convert sa puntos.

Kahit sa kanilang run-and-gun game ay gumawa lamang ang Blue Eagles ni coach Tab Baldwin ng 12 turnovers sa buong laro.

Umani si Kouame ng 20 puntos, 13 rebounds, 5 blocks at 3 steals para pa­­ngunahan ang pang-li­mang sunod na panalo ng Blue Eagles at manatili sa ikalawang puwesto sa 5-1 kartada sa likuran ng na­ngunguna at wala pang talong Adamson University Falcons (5-0).

Ang Green Archers na pinangunahan ni Aljun Melecio sa kanyang 23 puntos at 6 assists ay bumaba sa solo fourth spot sa 3-3 mar­ka.

Sa iba pang laro, sinandalan ng University of Sto. Tomas Growling Tigers ang three-point zone para pataubin ang University of the East Red Warriors, 80-66, at masungkit ang ika­lawang panalo sa anim na laro.

Kumonekta ang Grow­ling Tigers ng kabuuang 16 triples, lima rito ay mula kay Renzo Subido, habang may tig-tatlo sina Mar­vin Lee at  CJ Cansino at tig-dalawa naman sina Kenneth Zamora at Joshua Marcos upang lalong ibaon ang Red Warriors ni coach Joe Silva sa ilalim ng stan­ding sa 1-5.

Ang tanging panalo pa lamang ng Red Warriors ay sa FEU Tamaraws, 90-65, noong Setyembre 30.

Kahit si Zach Huang ay umiskor rin ng isang tres pa­ra tulungan ang España-based team na tuldukan ang kanilang three-game lo­sing skid.

Tumapos si Subido na may 22 puntos at si Cansino ay gumawa ng double-double sa kanyang 17 puntos at 17 rebounds bukod sa 4 assists at 1 block para sa UST ni coach Al­din Ayo na bumangon mu­la sa 72-99 pagkatalo sa Green Archers noong Oktubre 3.

“Pinaghandaan talaga namin ito,” sabi ni Cansino.