Hardbacks mipahagsa sa Jets

CEBU, Philippines — Si Donald de Leon ug ang bag-ong kaplag nga si Sylvester Millevo parehong mikadlit og double-double sa dihang gipahagsa sa Author Solutions Philippines Inc. (ASPI) Hardbacks ang Dyninno Jets, 58-52  aron pagsanta sa duha ka sagunson nilang pilde sa EVO League sa Tanduay Athletics E-Leagues for Basketball Season 14 niadtong Domingo sa City Sports Club-Cebu Gym.

Mitali og 16 puntos ug 12 ka rebounds si De Leon, samtang 12 puntos ug 10 ka rebounds ang nahimo ni Millevo sa  Hardbacks nga nagbitbit na karon og 4-3 nga baraha, samtang ang Jets adunay 3-2 record. Sa lain pang mga duwa sa EVO League, si Bryle Albert mipabuto og 28 puntos sa  Shearwater Health Crusaders nga nakaipsot sa Bombardier Grey Wolves, 60-59 alang sa ilang rekord ngadto sa 3-2, samtang sila si Ralph Alba ug Frelan Placencia nagkumboya'g 24 puntos  sa Cognizant Tech Solutions Gladiators  nga mibuntog sa CTC-BPO Panthers, 61-57 alang sa ikaduha nilang daog sa lima ka duwa. (BANAT NEWS)