Ancajas andam makig-'rematch'

CEBU, Philippines — Dili balibaran ni IBF super flyweight champion Jerwin Ancajas ang hagit ni Mexican Alejandro Santiago nga usa ka 'rematch' kun maoy gusto sa Top Rank Inc.

Si Ancajas pabilin nga IBF champion sud sa pito ka higayon human miresulta sa 'draw' ang iyang sangka ni Santiago. Sa maong resulta, daghan ang miingon nga dili pa angay ipaaway si Ancajas sa mga dagkong sangka sama sa unification batok ni WBC champion Srisakit Sor Rungvisai sa Thailand.

Alang ni Ancajas  siya ang midaog ug sayop ang resulta nga 'draw', apan andam usab siya nga ipamatuod kini kun  magkaharong sila pag-usab ni Santiago.

Hinuon, ang kampo ni Santiago miingon   nga usa ka maayong kampiyon si Ancajas ug ikalipay nila kun  hatagan niini si Santiago og laing higayon nga makasangka pag-usab ibabaw sa ring.

"I think Jerwin is a great champion. It was an amazing fight, a close fight," matud pa sa promoter ni Santiago nga si Paco Damian sa The Philippine Star, ang igsuong mantalaan sa Banat News.

Midugang si Damian nga kun dili man nila makuha ang 'rematch'   moaway sila bisan kinsa nga mas dagkong pangan nga boksidor ug andam sila ipakita nga usa ka title contender si Santiago. (BANAT NEWS)