Joshua pabiling heavyweight king
CEBU, Philippines — Bisan pa og misunggo iyang ilong, wala gihapon kini makapugong ni British boxing star Anthony Joshua sa pagpahamtang og kastigo sa iyang Russian challenger nga si Alexander Povetkin atol sa ilang sangka kagahapon didto sa Wembley Stadium.
Sa maong kalampusan, si Joshua midepensa sa iyang WBA, IBF ug WBO heavyweight title.
Dili hinuon sayun ang giagian ni Joshua tungod kay gibanatan siya pagmaayo ni Povetkin sa lawas atol sa sayung bahin sa away.
Wala hinuon magpakauwaw ang kampiyon atubangan sa 80,000 niya ka mga British fans ug mibalik siya aron mao na usab ang mubuhi og mga kombinasyon ngadto sa ulo sa Russian.
Pag-abot sa seventh round, usa ka makabungog nga right straight ang gibuhian ni Joshua nga maoy mitapos ni Povetkin sa round seven.
Si Joshua pabiling way pilde sa iyang 22-0 record diin 21 niini gikan sa knockout. Gi-anunsiyo usab niya nga mubalik siya og away sa Abril 13 apan wala pa siya mihingalan sa sunod niyang sangkaon.
Gidungog na nga si Joshua mohimo og 'super fight' tali sa mudaog sa laing duha ka heavyweight stars nga sila si WBC champ Deontay Wilder ug ex-champion Tyson Fury. (BANAT NEWS)
- Latest