TCC nakadaginot pa sa Batang Pinoy
CEBU, Philippines – Ang Team Cebu City (TCC) mitapos sa ilang kampanya pinaagi sa pagkabkab og dugang 11 ka gold, 11 sab ka silver ug tulo ka bronze medals sa katapusang adlaw sa 2018 PSC Batang Pinoy National Championships kagahapon didto sa Baguio City.
Sa unofficial medal tally, ang TCC adunay 36 ka gold, 40 ka silver ug 40 bronze medals.
Ang mga organizers sa maong multi-sport event nagdumili pa pagdeklarar og kampiyon tungod kay padayon pa nga gisumada ang tanang resulta. Hinuon, ang host team nga Baguio City maoy nag-una sa ilang 46 gold, 46 ka silver ug 57 ka bronze medal tally.
Mitunol og medalya sa TCC kagahapon mao ang Dancesport Team Cebu City nga mikabkab og tulo ka golds, unom ka silvers ug usa ka bronze sa kompetisyon nga gipahigayon didto sa University of Baguio. Ang mga paresan nga naka-gold mao sila si Shadelle Nina Hernandez ug Nigel John Angel sa juvenile C standard, Mitchloni Dinauanao ug Ralph Kevin Lapaz sa juvenile A standard ug Sofia Isabelle Quilaton ug Kharl Michael Minoza sa juvenile C Latin.
Misidlak usab ang kickboxers sa TCC dihang nakakubit sila og laing tulo ka bulawan sa Muay Thai competition. Ang mga bulawan gihatod nila ni Andre Lanz Caniga, Jemarie Josh Ybanez ug Ulysses Martinez.
Laing tulo ka kickboxers nga sila si Zion Alexander Melecio, Mark Renwel Alforque ug Joshin Dumaran mitunol og silver alang sa TCC.
Wala sab paalkansi ang volleyball boys team sa TCC diin mihakot sab sila og bulawan dihang ilang giharos ang Davao del Norte, 25-19, 25-16 samtang ang ilang girls basketball team mipilde sa Pangasinan, 72-62 aron pagdaog sa gold.
- Latest
