Philippines Team makakalaro sa World Cup—MVP

MANILA, Philippines — Mismong si Samahang Basketbol ng Pilipinas chairman emeritus Manny V. Pangilinan ang naniniwalang makakapaglaro ang national team sa 2019 FIBA World Cup sa China.

“Huwag tayong mawalan ng pag-asa. We will get there sa World Cup,” sabi ni Pangilinan matapos ang dramatikong come-from-behind 92-81 win ng Team Pilipinas laban sa Qatar sa FIBA World Cup Asian Qualifiers kamakalawa ng gabi sa isang closed-door game sa Smart Araneta Coliseum.

Sa likod ni dating Gilas mentor Chot Reyes ay nakapasok ang Nationals sa 2014 FIBA World Cup sa Spain at tumapos sa No. 21.

Itinaas ng Pilipinas ang baraha sa 5-3 sa Group F sa ilalim ng Australia (7-1) at Iran (6-2) at kasunod ang Japan (4-4), Kazakhstan (3-5) at Qatar (2-6).

Haharapin ng Nationals ang mga Kazakhs sa Nob­yembre 30 bago ang kanilang rematch sa Iranians sa Disyembre 3 na parehong home games kung saan inaasahan nang makakalaro sina four-time PBA MVP June Mar Fajardo (stress fracture shin ) at seven-footer Greg Slaughter (sprained ankle).

“I got my sights set on the next window. It'll come quicker than you think, just got to get ready,” sabi ng 30-anyos na si Slaughter. “It sounds exciting but we still need time to work on things and get together. We've never had a chance to play together.”

Sasagupain ng Team Pilipinas ang Qatar sa Pebrero 21 at ang Kazakhstan sa Pebrero 24 sa road games sa pagtatapos ng FIBA World Cup Qualifiers.

Kailangang umabante ang Nationals sa Top Three sa Group F para mapitas ang isang automatic berth sa 2019 FIBA World Cup sa China.

Laban sa Qatar noong Lunes ay inamin ni coach Yeng Guiao na hindi niya inaasahang magiging maganda ang three-point shooting ng mga Qataris.

Sa ipinukol na 7-of-13 clip sa 3-point range sa first half ay naitayo ng Qatar ang 17-point lead, 37-20 habang may malamyang 1-of-15 naman ang Team Pilipinas.

“I told them at halftime to take the normal shots they were taking, don't mind the percentages. Just be focused on running the sets, executing the game plan,” wika ni Guiao.

Sa third quarter ay hinigpitan ng Nationals ang depensa at nagpasabog ng 20-6 bomba para agawin ang 59-58 abante mula sa 39-52 pagkakaiwan sa halftime.