Pacquiao kabalikon na sa Amerika

CEBU, Philippines – Si Floyd Mayweather Jr. man o bisan kinsa pa ang iyang kontra, si Manny Pacquiao segurado sa usa ka butang -- nagplano siya nga ipasundayag ang sunod niyang away didto sa Amerika.

Sa dihang nahinabi sa mga tigbalita sa iyang panimay didto sa Dasmarinas Village, Makati, si Pacquiao mipadayag sa iyang interes nga mopakita na sab og aksiyon didto sa US diin kasagaran sa mga dagko niyang away didto gipahigayon.

"Matagal na akong hindi nakapunta ng US, eh," matud pa sa kasamtangang WBA welterweight champion segun sa taho ni Dino Maragay sa Philstar.com.

Katapusang miaway si Pacquiao didto sa US niadto pang Nobiyembre 2016 sa dihang iyang gidominar si Jessie Vargas didto sa Las Vegas. 

Ang sunod nga away ni Pacquiao mahitabo karong Disyembre o sa Enero sunod tuig diin si Mayweather maoy nag-unang kandidato aron iyang makabangga ilabi na sa nahitabo niadtong weekend didto sa Tokyo, Japan.

Sila si Pacquiao ug Mayweather nag-abot sa usa ka EDM (electronic dance music) event didto sa Tokyo niadtong Sabado ug wala kalikayi sa duha ka banggiitang boksidor ang maghisgut kabahin sa ilang 'rematch'. Gani human sa ilang panagkita, si Mayweather mianunsiyo dayon sa iyang Instagram nga naglantaw siya sa unahan nga sangkaon og usab si Pacquiao sa dili pa matapos ang tuig.

Gidasonan kini ni Pacquiao sa pag-ingon nga dako og posibilidad nga nagbinukbukay pag-usab sila ni Mayweather, tulo ka tuig human siya gipilde niini pinaagi sa unanimous decision sa labing dako nga away sa kasaysayan sa boksing.

Apan si Mayweather man o dili ang sunod niyang makaatbang, gusto ni Pacquiao nga adto sa Amerika ang sunod niyang away.