Leonard nagpa-train ni Bryant

CEBU, Philippines — Wala man matuman ang iyang gusto nga moduwa uban sa Los Angeles Lakers, ang All-Star nga si Kawhi Leonard mihimo hinuon og training camp ubos sa giya sa labing ngilngig nga Lakers player sa kasaysayan nga si Kobe Bryant.

Si Leonard todo ensayo alang sa giatngan niya nga pagbalik sa hardcourt human sa taas nga panahon nga wala siya kaduwa uban  sa San Antonio Spurs.

Ning higayona, si Leonard moduwa uban sa Toronto Raptors human  siya gi-trade sa Spurs atol sa off-season.

Si Leonard usa ka lumad nga taga Los Angeles mao nga nakahigayon siya og ensayo uban ni Bryant sa iyang pagbalik didto sa Los Angeles. Hinuon, bisan pa og didto siya nag-ensayo, ang kanhi Finals MVP mipasalig nga moserbisyo  siya og tinuod sa Raptors sa sunod season ug laraw niya nga dad-on ang koponan ngadto sa finals.

Nagkanayon si  Leonard nga dakong tabang ang pagpangayo niya og tabang ni Bryant, kinsa iyang gihulagway nga usa sa mga labing maayong scorer sa kasaysayan sa liga.

Gawas ni Leonard, una na usab nga mipaubos sa training ni Bryant ang duha ka rising stars nga sila si Jayson Tatum sa Boston Celtics ug Giannis Antetokounmpo sa Milwaukee Bucks. (BANAT NEWS)