Pilipinas pakyas

CEBU, Philippines — Mipakita unta og nindot nga salida ang  Pilipinas batok sa powerhouse Iran, apan wala makalahutay ang ilang kusog sa katapusang kuwarter hinungdan sa ilang kapildihan 73-81  sa second window sa 2019 World Cup Asian qualifier niadtong Huwebes sa gabii didto sa  Azady Gym sa Tehran, Iran.

Bisan wala ang ilang mga sinaligang sentro nga sila si Greg Slaughter ug JuneMar Fajardo, ang nasudnong koponan ni coach Yeng Guiao   mipakulba sa mga Iranian dihang milabaw sila og tres puntos sa dayong sud sa fourth period, 59-56.

Hinuon, wala sila kasustinir sa ilang nindot nga duwa  kay nakalitan sila sa pagratsada sa Iran, kansang higante nilang si Hamed Haddadi   wala kaayo gamita kay matud pa adunay gihambin nga minor injury.

Gawas sa paghugno sa ilang depensa sa final period, usa sab sa mga hinungdan  sa kaparotan sa Pilipinas mao ang ngil-ad nilang shooting  gikan sa 3-point area diin igo lang sila mipasud og lima sa ilang 28 ka itsa.

"We just couldn't make our shots," matud pa ni coach Yeng Guiao sa SPORTS5. "The open threes didn't fall for us."

Nakawang lang ang 30 puntos ug 12 ka rebounds ni  Christian Standhardinger kay napilde ang iyang koponan. Sila si Alex Cabagnot ug Beau Belga mitampo og nuybe ug siyete puntos matag usa.

Sa maong kapildihan, ang Pilipinas natagak sa 4-3 record, samtang ang Iran  misaka ngadto sa 6-1 ug  nakigsawo sa liderato uban sa Australia.

Bisan pa sa kapildihan, si Guiao nalipay gihapon sa gipakita sa iyang mga batos.

Nanghinaut si Guiao nga moduwa na uban kanila si Slaughter atol sa ilang sangka batok Qatar sunod semana didto sa Smart Araneta Coliseum.