Gilas Pilipinas ‘di puwedeng matalo sa Qatar--Cone
MANILA, Philippines — Para kay Barangay Ginebra coach Tim Cone, mas mahalagang talunin ng Team Pilipinas ang bibisitang Qatar sa Lunes kesa ang nalasap na kabiguan sa Iran noong Huwebes sa Tehran.
Sa fourth window ng 2019 FIBA World Cup Asian Qualifiers ay may 4-3 record ang Nationals kung saan natalo sila sa Australia, China at Iran.
May magkatulad na 6-1 baraha ang Iran at Australia sa pinagsamang Group F kasunod ang Pilipinas (4-3), Japan (3-4), Kazakhstan (3-4) at Qatar (3-4).
“That is more of a must-win game than this one because Qatar is behind and you have to keep them behind,” ani Cone, bahagi ng TV-broadcast crew na nag-cover sa 73-81 talo ng Nationals sa mga Iranians.
“This (Iran) would be a nice, bonus game to win but it’s not the one that’s necessary to get in the World Cup,” dagdag pa ng two-time PBA Grand Slam champion coach.
Sasagupain ng Team Pilipinas ang Qatar sa Lunes sa Smart Araneta Coliseum na isasara sa publiko bilang bahagi ng parusa ng FIBA sa Samahang Basketbol ng Pilipinas.
Noong Hulyo 2 ay nasangkot sa rambulan ang Nationals at mga Aussies sa Philippine Arena sa Bocaue, Bulacan kung saan 10 miyembro ng koponan ang sinuspinde kasama sina naturalized center Andray Blatche, dating coach Chot Reyes at assistant Jong Uichico.
Laban sa Iran ay nagtala ang mga Pinoy cagers ng malamyang 5-of-28 shooting sa three-point range at 25-of-65 clip sa two-point line.
“The national team is all about development, developing the team and getting better,” wika ni Cone. “I thought technically, this was played well. We played a good, technical game. We just didn’t get shots.”
- Latest