Arum mihikay na sa bayranan nila ni Pacquiao

CEBU, Philippines – Si Top Rank chairman Bob Arum mipahibawo kagahapon nga ila  nang gihikay sa kasamtangan ang pinansiyal nilang obligasyon ngadto ni Manny Pacquiao kabahin sa TV rights sa miagi niining away batok mi Lucas Matthysse.

Gihimo kini ni Arum usa ka adlaw human si Pacquiao mibahad nga mohimo siya og legal nga aksiyon batok sa Top Rank ug sa uban pang mga hintungdan gumikan sa wala pagbayad niini sa iyang TV rights atol sa iyang sangka batok ni Matthysse niadtong Hulyo 15 didto sa Malaysia.

Matud pa ni Pacquiao nga giandam na sa iyang legal team ang tanang mga dokumento nga ilang gikinahanglan aron pormal na nilang mapasaka ang kaso batok sa Top Rank ug sa pipila ka mga indibidwal gumikan sa wala niini paghatag sa iyang bahin sa kita sa telebisyon sa maong away diin iyang gipakamang si Matthysse sa ikapitong hugna aron pagsakmit sa WBA welterweight title.

Masaligon hinoon si Arum nga maresolba ra ang tanan ilabi na kay ila na mang gihatagan og pagtagad ang maong isyu.

“We read the Instagram post and Top Rank attorney Harrison Whitman handled it with Pacquiao’s attorney, and it looks like everything will be resolved,” dason pa ni Arum ngadto sa ESPN.?

Sa dihang gisukna kon nganong nalangay sila paghatag sa bahin ni Pacquiao sa kita sa ilang pagpasalida sa away niini pinaagi sa live streaming didto sa Amerika, Canada ug Puerto Rico, si Arum mitubag nga kini gumikan sa kapakyas sa Pinoy ring star pagpirma ug pagbalik sa kontrata nga naglatid sa ilang kasabotan.

Daw dili na hinoon gusto pa og gubot si Arum gumikan kay mipakita kini og timailhan nga andam kining sulbaron ang tanan labi na ang yangungo ni Pacman aron magmalipayon ang tanan.