Sinukmagay na!: Nietes, Palicte mag-ilog sa WBO title karon
CEBU, Philippines — Ang garbo sa ALA Gym nga si Donnie 'Ahas' Nietes (41-1-4, 23KOs) mosuway og semento sa iyang legasiya sa dihang iyang sangkaon ang kababayan niyang si 'Mighty' Aston Palicte (24-2, 20KOs) sa usa ka all-Filipino world championship bout alang sa bakanting WBO super flyweight belt karong adlawa didto sa The Forum sa Inglewood, California.
"May the best man win," maoy mubo nga tubag ni Nietes sa dihang gipangayoan sa pinal niyang mensahe human nakuha ang 114.6 ka libras nga timbang atol sa official weigh-in kagahapon. Si Palicte mitimbang og 114.8 ka libras.
Sulagma kaayo nga ang duha parehong mga Negrense. Si Nietes lumad gikan sa Murcia, Negros Occidental, samtang si Palicte nagagikan sa Bago City sa susamang probinsiya.
Usa na ka three-division world champion, ang 36-anyos nga si Nietes naglaraw nga modaog sa ikaupat niyang titulo sa lain nga weight division aron malinya ang iyang pangan uban nilang Manny Pacquiao ug Nonito Donaire, Jr.
“This fight represents a lot to me as I will seeking my fourth world championship in a fourth different weight division. Winning the world title will put me at the level of Manny Pacquiao and Nonito Donaire and will add worldwide recognition to my career,” dason pa ni Nietes, nga way pilde sa 33 ka away sukad pa niadtong 2004.
Lisud hinoon nga hagit ang sagubangon ni Nietes ilabi na kay ang pipila ka mga batid nagtoo nga maglisud siya sa mas batan-on, mas taas, ug mas dako nga sa Palicte.
Mismo si Palicte ang mideklara nga naglungot-lungot siyang modaog og korona bisan og kababayan pa niya ang iyang pildihon.
- Latest
