Novtek-Federal bag-ong kampiyon sa CHBC basketball tournament

CEBU, Philippines — Nakasugakod sa tanang mga pagsulay ang Novtek-Federal dayon na pagposte og 95-91 nga daog batok sa CHBC Reclamation sa kulbahinam nilang final showdown aron koronahan isip bag-ong kampiyon sa second conference sa Cebu Home & Builders Centre (CHBC)-Pardo Ballclub basketball tournament niadtong Biyernes didto sa UBCA gym sa Quiot, Basak sa Dakbayan sa Sugbo.

Mihamag dayon ang Novtek-Federal pagsugod aron molansang og 32-15 nga bentaha sa pagpangulo ni Nelson Peralta nga mihakot og 13 puntos human sa unang 10 minutos sa duwa.

Sa kinatibuk-an, si Peralta adunay 27 puntos nga igo na kaayo aron mangu sa balanseng opensa sa Novtek-Federal, gisundan ni Bernard Yule  nga midiskarga og 18 puntos.

Mipakitang gilas sab silang Mack Louie Lepiten ug Steven Uy nga nagkumboya'g 22 puntos sa Novtek-Federal nga bisan pa man sa kalisdanan nga ilang naagian nakahimo gihapon pagkawat sa korona.

Gawas sa championship trophy, nakuha sab sa Novtek-Federal ang duha sa labing taas nga individual award gumikan kay si Yule maoy napiling Finals MVP ug si Peralta   gibayaw nga Season MVP.

Nakaigwalis ang CHBC Reclamation sa unang higayon, 46-all sa sayong bahin sa third period sa basket ni Dirk Diola ug milabaw pa gani og singko puntos, 61-56, apan si Yule miariya og siyam ka sunod-sunod nga puntos sa fourth quarter nga maoy mihaling sa naglagiting nga rally sa Novtek-Federal.

Si Leo Desuyo mao sab ang nangu sa CHBC Reclamation nga mihakot og 18 puntos, si Raymond Dungog miamot og 14 puntos, samtang si Franze Quiambao mitampo'g 11 puntos sa napildeng koponan.

Sa pasiunang duwa, ang CHBC Plaridel mipilde sa CHBC Pardo-A, 104-95 aron pagsakmit sa third place trophy.

Naglisud ang CHBC Plaridel sa nag-unang duha ka kuwarter hinungdan nga nabiyaan sila, 50-57 sa halftime.

Human nila nailog ang 62-57 nga labaw sa third period, kontrolado na sa CHBC Plaridel ang duwa hangtod nahurot ang oras.

Si Gilbert Corpuz miariya og 28 puntos aron pangulohan ang Plaridel, gisundan ni Silas Dayanan sa iyang 14 puntos, samtang sila si Jason  Amolo ug Rogelio Fuentes Jr. nagtampohay og 12 puntos.

Gipangulohan sab ni Fordy Bilocura ang Pardo-A nga miburak og 22 puntos, samtang laing upat niya ka teammates ang miiskor sab og double figures.

Ang liga ubos sa  superbisyon ni commissioner James Palioc   sa abag sa iyang mga committee nga silang Gabriel Salomon, Dortads Bilocura, Gyle Martillan, Joseph Abellanosa, Nelson Villaso ug Pablo Cabrera.

Puntos Matag Usa

Unang duwa:

PLARIDEL (104) – Corpus 28, S. Dayanan 14, Amolo 12, Fuentes 12, Abejar 9, Lana 9, Bernido 5, Dayanan 5, Cuizon 2, M. Dayanan 2, Edusma 2, Vince  2,  Molos   2,  Plarisan 2.

PARDO-A (95) – Bilocura 22, Bercero 19, Bacatan 14, Martillan 13, Tungon 11, Juhan 9, Butalid 6.

Ikaduhang duwa:

NOVTEK-Federal (95) – Peralta 27, Yule 18, Lepiten 12, Uy 10, Mondigo 6, Baay 5, Sollano 3, Maldo 3, Camay 2, Soscano 2, Escandallo 2, Jerbert 2.

RECLAMATION (91) – Desuyo 18, Dungog 14, F. Quiambao 11, Diola 9, Bacus 9, Navares 9, Olmedo 4, Romero 4, Niones 4, Lahoy-Lahoy 3, Tiu 3, Torque 2. (BANAT NEWS)