Tabal andam na; medalya ug personal best iyang tuyo
CEBU, Philippines — Andam na si Cebuana Olympian Mary Joy Tabal alang sa laing dako niya nga misyon nga mao ang pagdaog og medalya sa 18th Asian Games karong Domingo didto sa Indonesia.
Si Tabal gikan lang sa subsob niyang training didto sa Italy.
Gawas sa medalya, tuyo sab ni Tabal nga morehistro og personal best nga duha ka oras ug 40 minutos.
Alang sa 29-anyos nga si Tabal, ang pagsalmot sa Asian Games usa ka espesyal kay morepresentar na siya karon sa nasud sa tanang tulo ka dagkong multi-sporting events lakip na ang Olympics ug Southeast Asian Games diin siya midaog og bulawang medalya.
Inspirado sab si Tabal tungod sa suporta nga iyang nadawat lakip na ni Cebu City Mayor Tomas Osmeña.
Napun-an sab ang kadasig si Tabal tungod kay ang kauban niyang Cebuana nga si Rinna Babanto segurado na og bronze medal niadtong Domingo sa taekwondo event.
"I am happy for her (Rinna Babanto). She will definitely be an added inspiration for me to work harder," matud pa ni Tabal.
Ang marathon queen sa nasud mag-atubang og lisud nga hagit batok sa laing elite female marathoners gikan sa Bahrain, Japan, China ug Korea. (BANAT NEWS)
- Latest
