Teleperformance gi-usban ang Convergys
CEBU, Philippines — Giusban og parot sa Teleperformance Vipers ang three-time defending champion Convergys Converters, 64-53, ubos sa Elite Classic division sa Tanduay Athletics E-Leagues for Basketball Season 14 niadtong Sabado didto sa City Sports Club-Cebu Gym.
Si Mon Xavier Dico mitapos uban ang 13 puntos, 12 ka rebounds, duha ka assists ug duha ka steals alang sa Vipers nga pabiling nag-solo sa ikaduhang dapit sa liderato bitbit ang 5-1 record.
Si Michael Adam Pagdalian dunay 12 puntos apan naminghoy gumikan kay ang Converters misukarap ngadto sa ikatulo nilang pilde sud sa lima ka duwa.
Sa laing aksiyon sa Elite Classic, ang Accenture Sharks mikastigo sa QBE Generals, 86-51, alang sa ikalima nilang sagunson nga daog.
Sila si Archie Brian Vincent Batua, Junas Marion Misa ug Jetro Gonzaga nagkumboya og 38 puntos alang sa Sharks.
Mihipos si Stuart Foot og 13 puntos alang sa Generals nga bokya gihapon human sa tulo ka duwa.
Sa EVO League, ang Dreamscape Networks Lions nagpabiling way pilde human gibugha ang Results Manila Spartans, 63-56, samtang ang JP Morgan Chase Bankers fashioned mipaksit sa Cognizant Tech Solutions Gladiators, 58-46. (BANAT NEWS)
- Latest
