Anthony usa na ka Rocket
CEBU, Philippines — Hingpit nang usa ka Rocket si Carmelo Anthony human kini mipirma og usa ka tuig nga kontrata nga balor og $2.4 million uban sa Houston kagahapon.
Gipahibawo sa Rockets ang maong kalamboan pinaagi sa pag-post og hulagway sa Twitter diin si Anthony mipirma sa kontrata.
Kini nagpasabot nga ang kanhi All-Star forward moduwa sa ikaupat niyang NBA team sud sa 13 ka bulan.
Ang 34-anyos nga si Anthony mi-average og 16.2 points sud sa 78 ka duwa sa miaging season uban sa Oklahoma City Thunder. Ang maong numero maoy labing ubos sa iyang karera.
Gi-trade siya sa Thunder ngadto sa Atlanta Hawks sa miaging bulan, apan wala magdugay gibuhian sab dayon siya sa Hawks.
Ubos sa Rockets, si Anthony maghiusa og puwersa nilang MVP James Harden ug star point guard Chris Paul.
Ang No. 3 overall pick sa 2003 NBA Draft mi-average og 24.1 points ug tulo ka assists sa 15 ka tuig niyang karera diin siya nakaduwa sab sa Denver Nuggets ug New York Knicks.
Usa ka 10-time All-Star, si Anthony nakadaog og tulo ka bulawang medalya sa Olympics sul-ot ang uniporme sa Amerika. Siya maoy all-time leading scorer ug rebounder sa USA Basketball. (BANAT NEWS)
- Latest