PSC monthly boxing padayonon
CEBU, Philippines — Magpabilin nga buhi ug sayag ang amateur boxing dinhi sa Sugbo gumikan kay padayonon sa Philippine Sports Commission (PSC) Visayas ang binulan niining programa sugod karong Agosto 19 diha sa Cebu City Sports Center.
Si Amateur Boxing Alliances of the Philippines (ABAP) Central Visayas head ug PSC coordinator in-charge of boxing development Lorenzo 'Chao' Sy mapasigarbuhon nga mipahibawo sa pagbalik sa PSC sa maong dalaygon nga proyekto alang sa mga Sugboanong boksidor.
"The PSC Amateur Boxing Program is a separate undertaking from the Cebu Amateur Boxing Revival in which I partnered with Cebu boxing patron sir Antonio Aldeguer. PSC wanted this separate program apart from the boxing revival, in which we put on hold for the moment because we want it to be the venue for elite boxers," pasabot pa ni Sy.
Si tournament manager Serafion 'Jungkoy' Cortes nagkanayon nga ang binulan nga torneyo masentro sa age brackets ug dili sa kalibre sa abilidad sa mga boksidor.
Mga kategoriya nga banatan mao ang 12-under, 13-14, ug 15-16 age groups.
Ang minimum weight gitakda sa 28 kgs. alang sa 12-under, 32 kgs. sa 13-14 ug 38 kgs. sa 15-16 age bracket.
Bukas sab ang torneyo alang sa mga babayeng boksidor.
Giawhag ni Sy kadtong mga interesado nga moduso sa ilang line-up sa labing dali nga panahon kay ilang gilimitahan ngadto lamang sa 12 ka bouts ang matag event.
Alang sa dugang mga kasayoran, mahimong motawag ni Cortes (0942-2058751) o dili ba mobisita sa Hotel Fortuna front desk sa dalan Borromeo Dakbayan sa Sugbo.
Sa laing kalamboan, gipahibawo ni Sy nga ablihan na sa dili madugay ang PSC Boxing Training Center diha sa Peace Valley subdivison sa Barangay Lahug.
Ang mga boksidor mahimong mo-train ug mogamit sa maong pasilidad nga magsilbe sab unya nga binyu sa mga torneyo sa boksing nga pasiugdahan sa PSC. (BANAT NEWS)
- Latest
