Monterroyo batok Lesin sa CELBA finals
CEBU, Philippines — Gitagak sa LBS ug Monterroyo ang tagsa-tagsa nilang karibal aron maoy mag-abot sa kampiyonato sa CELBA Season 3 basketball tournament niadtong Sabado didto sa Canduman Housing gym, Mandaue City.
Ang LBS mipilde sa Butch Surveying sa iskor nga 87-83 aron mabira ang unang lingkoranan sa finals, samtang ang Monterroyo midemolis sa Explorer, 90-70.
Si Loloh Sicad mikabya og 12 puntos ug maoy nangu sa scoring sa LBS. Ang team manager nga si Gilbert Lesin miamot og 11 puntos aron tabangan iyang koponan pagtaak sa labing unang higayon sa finals. Nagtampohay sab og 11 puntos sila si Pedro Villarosa ug Barak Recto sa LBS nga dominante kaayo sa maong duwa.
Ang Butch Surveying gipangulohan nilang Ramie Suson ug Edgar Alcover nga nagkumboya'g 32 puntos.
Sa laing bahin, sila si Alexam Amaga ug Ramil Estremos kuyaw kaayong nakaduwa nga nagkumbinar og 32 puntos aron pangulohan ang opensiba sa team ni Dr. Raul Monterroyo. Si Amaga mitikdol og 19 puntos, samtang si Estremos mitimang og 13 puntos.
Mikawat sab og salida si Johnny Landiza nga mitimbre og 10 puntos sa Monterroyo nga misirit human nila mailog ang 24-21 nga labaw sa tunga-tungang bahin sa second quarter.
Nangulo sa natagak nga Explorer mao si Jun Aseo nga mikadlit og 13 puntos, gisundan ni Roberto Ochea nga adunay 10 puntos.
Ang championships duwaon karong Sabado diin magsangka sa unang duwa mao ang Butch Surveying ni Engr. Butch Migriño ug playing coach Tony Alcover batok sa Explorer ni Alan Buenavista nga mag-ilog alang sa ikatulong puwesto.
Ang liga nga giorganisar ni S/Insp. Dondon Coloscos, gipadagan nilang commissioner Ramel Baclay uban nilang Willy Medillo, Lloyd Chavez, Richard Limosnero, Roel Tayag ug Wendel Oquias.
Gipaluyohan sab kini sa Bol-anon Eatery nga maoy misagubang sa tanang premyo alang sa mga mananaog.
Puntos Matag Usa
Unang duwa:
LBS (87) – Sicad 12, Lesin 11, Villarosa 11, Recto 11, Villaronza 9, Lungtad 8, Pacquiao 8, Ocier 6, Budiongan 5, Abatayo 4, Limosnero 2.
BUTCH Surveying (83) – Suson 18, E. Alcover 14, Mahusay 9, Herbieto 8, Monterola 6, Aligway 6, T. Alcover 6, Cabonelas 5, Castillo 5, Gonzaga 4, Magale 2.
Ikaduhang duwa:
MONTERROYO (90) – Amaga 19, Estremos 13, J. Landiza 10, Monsanto 9, Tañan 8, Mendoza 6, W. Landiza 6, Jacalan 5, Tantuan 4, Monterroyo 3, Alvarez 3, Sugay 2, Armero 2.
EXPLORER (70) – Aseo 13, Ochea 10, Setenta 6, R. Limosnero 6, Ferolino 6, Molit 5, Costanilla 4, Rama 4, Buenavista 3, Gomez 3, Puerto 2, Yares 2, Tion 2, Amancio 21, Medillo 2. (BANAT NEWS)
- Latest