Lahat pokus kay Brownlee

MANILA, Philippines — Ngayon pa lamang ay inaasahang pinaplano na ng 11 pang koponan kung paano pipigilan si Barangay Ginebra resident import Justin Brownlee para sa darating na 2018 PBA Governor’s Cup.

Nagposte ang 6-foot-5 na si Brownlee ng mga ave­rages na 31.5 points, 10.5 rebounds at 5.8 assists sa nakaraang best-of-seven championship series ng Gin Kings at San Miguel Beermen sa 2018 PBA Commissioner’s Cup.

Idedepensa ng Ginebra ang kanilang korona sa nasabing season-ending conference na magsisimula sa Agosto 17.

“I see some of the imports coming in for the Governors’ Cup, and very talented, a lot of really good imports. I’m sure it’s gonna be very tough,” wika ng 30-anyos na si Brownlee.

Dalawang beses tinalo ni Brownlee at ng Gin Kings si two-time PBA Best Import Allen Durham at ang Meralco Bolts sa huling dalawang edisyon ng PBA Governor’s Cup noong 2016 at 2017.

Muling kinuha ng Meralco si Durham para resbakan ang Ginebra at si Brownlee, hinirang na Best Import ng nakalipas na 2018 PBA Commissioner’s Cup.

“Nobody can really match up to him,” sabi ni coach Tim Cone sa inilaro ni Brownlee sa nasabing mid-season tournament. “But come the Governors’ Cup, there’s a lot of imports out there that can match up to him.”

Bukod kina Brownlee at Durham, ang iba pang balik-imports ay sina Arizona Reid ng San Miguel, Eugene Phelps ng Phoenix, Henry Walker ng Blackwater, J’Nathan Bullock ng Rain or Shine, Romeo Travis ng Magnolia, Mike Glover ng TNT Katropa at Olu Ashaolu ng NLEX.

Ipaparada naman ng Alaska ang bagong hugot na si Manny Harris kagaya nina Akeem Wright ng Columbian at Rashad Woods ng Northport (dating Globalport).

Wala pang inilalabas ang PBA Commissioner’s Office ng opisyal na iskedyul para sa naturang komperensya.