Tapales mobalik og away
CEBU, Philippines — Human sa 17 ka bulan nga pahuway, ang kanhi WBO bantamweight champion nga si Marlon 'Maranding Nightmare' Tapales sa Rex 'Wakee' Salud Stable mobalik og away diin iyang sangkaon si Goodluck Mrema sa Tanzania unom ka semana gikan karon didto sa kaulohan.
Si Sanman Promotions CEO JC Manangquil nga miabag ni Salud paghatag og direksiyon sa karera ni Tapales, mipahibawo sa iyang Facebook page kagahapon nga si Tapales magsilbeng supporting main event sa bugno nilang Reymart Gaballo ug Julias Kisarawe karong Septiyembre 30 didto sa Sky Dome sa SM City North EDSA sa Quezon City.
Ang 26-anyos nga si Tapales wala na makaaway pa sukad iyang gipakamang sa ika-11 nga hugna ang Hapon nga si Shohei Omori niadtong Abril 23, 2017 didto sa EDION Arena sa Osaka, Japan.
Sa maong away, si Tapales modepensa unta sa iyang WBO belt sa labing unang higayon, apan ang garbo sa Kapatagan, Lanao del Norte nahuboan sa iyang bakus bisan og wala pa makalabay og kumo gumikan kay wala makakuha sa ensaktong timbang nga 118 ka libras atol sa official weigh-in.
Karon nga mikampanya isip junior featherweight, si Tapales naglantaw ngadto sa bag-ong pahina sa iyang karera nga napuno sa kadasig.
"Excited kaayo ko nga moduwa og balik. Ako ipakita sa tanan nga duna pa ko'y kapasidad nga mamahimong world champion pag-usab", matud pa ni Tapales nga hugtanon karong nagbansay-bansay didto sa Sanman Gym sa General Santos City pangandam sa iyang ring comeback.
Si Tapales nga nakabangon human matumba duha ka higayon dayon ngadto sa pagpatikangkang ni Pungluang Sor Singyu sa ika-11 nga hugna aron dag-on ang WBO bantamweight title duha ka tuig na ang milabay didto sa Ayutthaya, Thailand, nagbitbit og 30-2 record uban ang 13KOs, samtang si Mrema nagkupot og 22-3 nga baraha uban ang 12KOs.
Ang 23-anyos nga si Mrema mao ang boksidor nga gipilde ni Jeo Santisima sa ALA Gym pinaagi sa knockout sud lamang sa usa ka hugna niadtong Hulyo 8 sa miaging tuig diha sa IEC Convention Center sa Barangay Mabolo, Cebu City. (BANAT NEWS)
- Latest
