Brownlee gustong maging naturalized player ng Gilas
MANILA, Philippines — Sa kanilang victory party para sa mga fans kahapon ay nagbiro si Barangay Ginebra resident import Justin Brownlee.
Sinabi ni Brownlee kay Alfrancis Chua, ang kinatawan ng Gin Kings sa PBA Board of Governors, na gusto niyang maging isang naturalized player ng Gilas Pilipinas.
“Hindi na si Brownlee ang import dahil gagawin na natin siyang Pilipino,” pagbibiro ni Chua. “Sinabi ni Brownlee sa amin kaharap ang buong team, ‘Boss, I want to be naturalized.”
Payag naman ang San Miguel Corporation na ibigay ang 30-anyos na si Brownlee sa Gilas Pilipinas pagkatapos ng kanyang paglalaro para sa Ginebra.
Kung sakali ay maihahanay ang 6-foot-5 na si Brownlee kina 6’8 Marcus Douthit at 6’9 Andray Blatche bilang naturalized player ng Gilas Pilipinas.
Ang problema lamang ay mas gusto ng Samahang Basketbol ng Pilipinas ng malaking naturalized player para isabak sa mga torneo ng FIBA.
Inihatid ni Brownlee ang Gin Kings sa dalawang sunod na kampeonato ng PBA Governor’s Cup noong 2016 at 2017 at sa katatapos na 2018 PBA Commissioner’s Cup.
Kinuha ng Ginebra si Brownlee matapos magkaroon ng thumb injury si Paul Harris sa una nilang laro laban sa Globalport noong 2016 PBA Governor’s Cup.
Muli naman siyang tinapik ni two-time PBA Grand Slam champion coach Tim Cone bilang kapalit ni 6’10 Charles Garcia nang mabaon ang Gin Kings sa 1-5 record sa 2018 PBA Commissioner’s Cup.
“I just want to keep doing good, just keep working hard and whatever comes with that, you know I’ll take it,” sabi ni Brownlee, ang hinirang na PBA Best Import sa nasabing mid-season conference.
- Latest