Governor's Cup title ambisyon sa Ginebra

CEBU, Philippines – Human sa ilang malampuson  nga kampanya sa PBA Commissioner's Cup, si Barangay Ginebra star center Greg Slaughter kompiyansa  nga makahimo sila og  'back-to-back'  championship.

Ang 7-footer nga Cebuano nagkanayon nga nakita ang tinuod nga kusog sa ilang koponan sa miaging finals ug kon himsog lang sila, dili lisud nga sila usab ang maghari sa Governor's Cup, ang ikatulo ug katapusang conference karon nga season nga buksan sa hinapos nga bahin ning tuiga.

Ang Ginebra mao usab ang defending Governor's Cup champion  hinungdan nga mas kompiyansa sila paingon sa conference. Lahi sa ubang teams, ang Ginebra moduwa uban ang  pamilyar nilang import nga si Justin Brownlee.

Sa iyang bahin, si Ginebra coach Tim Cone miingon nga dakong butang nga anaa kanila nga himsog si Slaughter tungod kay siya ra ang may abilidad nga makadepensa sa giisip nga labing dominanteng player karon sa PBA nga si JuneMar Fajardo.