Monterroyo, Lesin mihitsas sa CELBA semis
CEBU, Philippines – Nahitsas na ang upat ka teams nga moduwa sa semifinals sa Cebu Legends Basketball Association (CELBA) Season 3 dihang gitagak dayon sa 'twice-to-beat' Monterroyo ug Lesin ang ilang tagsa-tagsang kaatbang niadtong Miyerkules didto sa Canduman Housing gym, Dakbayan sa Mandaue.
Nagmangtas si Michael Tañan sa fourth quarter diin miiskor siya og 10 sa iyang 13 puntos aron pangulohan ang Monterroyo nga dominante kaayo gikan sa pagsugod. Sila si Ramil Estremos ug Ely Tantuan mitampo'g 10 puntos matag usa alang sa playing team manager Dr. Raul Monterroyo.
Si S/Insp. Dondon Coloscos mao lang ang naka-double figures sa iyang team nga AC Troopers nga mipaarak og 11 puntos.
Naluya og ginukod ang AC Troopers ug gibiyaan sila og otso puntos, 65-57, apan nalagsik dihang nakatabla, 67-all sa 3-point shot ni Coloscos sa katapusang 1:37 sa final period. Nahigmata ang Monterroyo ug milusad dayon og 5-0 run aron inato'g balik ang ilang labaw, 72-67 sa daginutong oras.
Misikit og balik ang AC Troopers dihang mipabuto og laing tres si Coloscos, 73-74, apan ulahi na ang tanan niyang paningkamot kay naabtan sila sa oras.
Sa laing bahin, ang Lesin yano kaayong misulod sa semis dihang ilang gipakaging ang VFL, 90-77.
Mikulit og 20 puntos si Barak Recto aron mangu sa scoring sa Lesin. Ang team manager nga si Gilbert Lesin, Reyden Villaronza ug Pedro Villarosa mitampo'g 10 puntos matag usa sa kadaogan.
Si Tim Cabrera mao sab ang nangu sa VFL ni Jerome Villaflores nga mikamada og 12 puntos.
Ang liga gipaluyohan sa Bol-anon Eatery nga maoy miangkon sa premyo alang sa mga mananaog.
PUNTOS MATAG USA
Unang duwa:
LESIN (90) – Recto 20, Sicad 14, Lesin 10, Villaronza 10, Villarosa 10, Budiongan 9, Pacquiao 7, Rosaceña 6, Ocier 4.
VFL (77) – Cabrera 12, Cañas 10, Seno 7, Rafada 7, Villaflores 6, Destrouse 6, Prieto 6, Gemongala 5, La Peña 5, May 4, Cabarles 4, Genobia 3, Alabat 2.
Ikaduhang duwa:
MONTERROYO (74) – Tañan 13, Estremos 10, Tantuan 10, J. Landiza 6, Monsanto 6, Amaga 6, Mendoza 4, Jacalan 4, Ecot 3, Alvarez 3, Armero 2, Sugay 2, Monterroyo 2, W. Landiza 2.
AC Troopers (73) – Coloscos 11, Cabahug 8, Chavez 8, Saldua 8, Englis 7, Acusar 5, H. Magale 5, Cabiluna 5, Suico 4, Tayag 3, Postrano 3, Areja 2, Baclay 2, Lavador 2.
- Latest
