Knicks gusto na mopalayas ni Noah
CEBU, Philippines – Subling gipadayag sa New York Knicks nga gusto nilang buhian ang sentro nilang si Joakim Noah.
Segun sa taho nilang Adrian Wojnarowski ug Ian Bagley sa ESPN ug Fred Kerber sa New York Post, ang Knicks naglantaw nga i-waive ang nahibiling kontrata ni Noah uban kanila kon ugaling dili sila molampos pag-trade niini.
Ang 33-anyos nga si Noah duna pa'y nahibiling duha ka tuig nga kontrata sa Knicks nga balor og $37.8 million.
Ang Knicks niadto pang Pebrero nga gustong molabay ni Noah ngadto sa laing team, apan hangtod karon wala pa gihapon kini nila mahimo kay wala pa man sila kakita og team nga makahatag sa ilang gusto puli ni Noah.
Si Noah mitikang sa poder sa Knicks niadtong 2016, apan niadtong Marso 2017 nasuspenso siya og 20 ka duwa gumikan sa kalapasan sa lagda sa NBA kabahin sa ginadiling droga.
Ang maong suspensiyon naka-palingkod kaniya og 12 ka duwa sa 2017-2018 season.
Niadtong 2016-2017, si Noah mi-average og 5.0 points, 8.8 rebounds ug 26 minutos matag duwa, apan mikunhod ang iyang mga numero ngadto sa 1.7 points, 2 rebounds ug 5.7 minutos sa pito ka duwa sa miaging season.
- Latest