E&F Surplus, RJ Store nagsawo liderato sa 13th J&J Surplus 30-above basketball

CEBU, Philippines – Padayong gihuptan sa E&F Surplus ang liderato ug ning higayona uban sa RJ Store human  milampos sa tagsa-tagsa nilang misyon sa 13th J&J    Surplus   Ballclub      30-above basketball tournament niadtong Martes sa GT Academy gym sa Tayud, Lilo-an.

Ang E&F Surplus mipilde sa Union Galvasteel, 76-67 ug ang RJ Store mipukan sa Doms Autoparts, 57-48 alang sa ilang 3-0 win-loss records.

Ang tandem nilang Tingan Gestopa ug Fury 'Triggerman' Trazona mao gihapon ang responsabli sa kadaogan sa E&F Surplus nga mi-outscored sa Union Galvasteel sa fourth quarter, 27-7 aron mapanalipdan ang limpiyo nilang baraha.

Si Gestopa miratsada og 25 puntos, samtang si Trazona mikamada og 12 puntos. Si Tata Betinol miamot og 10 puntos sa E&F Surplus nga bugnaw pa kaayo sa first half.

Sila si Manolito Dejarme ug Jaybee Gellocane nagkumboya'g 30 puntos sa Union Galvasteel ni Arnold Labustro nga wala pa'y daog sa tulo ka duwa.

Sa laing bahin, ang RJ Store nga gipaluyohan sa Chichay's Chicharon gipangulohan nilang Jay-R Yerro ug Johnrey Caparroso nga parehong mitimbre'g 11 puntos.

Sikit kaayo ang duwa sa duha ka kampo diin nagsinukliay kini og mga puntos, apan ang RJ Store ni Jun Raya Pepito maoy gitugahan sa maayong palad aron maangkon ang ikatulong daog.

Ang Doms Autoparts ni Doms Mercader gipangulohan nilang Godinez ug Cadlog Capao nga nagkumbinar og 26 puntos.

Sa lain pang duwa, ang 4Nichols Farm mikulit sa ikaduha nilang sunod-sunod nga daog pinaagi sa pagpilde sa J&J Surplus, 95-84.

Upat ka 4Nichols players ang miiskor og double figures sa pagpangulo ni team captain William Alegado nga miposa og 24 puntos.

Gipangulohan sab nilang Jomar Tiwan  ug Larry Oroyan ang J&J Surplus nga miariya og 20 puntos matag usa.

Ang 4Nichols aduna na'y 2-1 win-loss record ug ang J&J Surplus ni ballclub president Henry Agbon nagbitbit og 2-1 nga baraha ning maong liga nga gipadagan ni commissioner Fury Trazona sa abag nilang Chang Tejero, Marcos Bardon ug Choy Pilapil.

PUNTOS MATAG USA

Unang duwa:

E&F Surplus (76) – Gestopa 25, Trazona 12, Betinol 10, Ursal 7, A. Sabang 7, Judaya 6, Laude 5, Caballes 2.

UNION Galvasteel (67) –  Dejarme 20, Gellocane 10, Tiongzon 8, Boyles 7, Judaya 5, Flores 4, Mantos 4, Yballe 3, Obial 2, Macasero 2, Labustro 2.

Ikaduhang duwa:

4NICHOLS Farm (95) – Alegado 24, Lascuna 22, Apas 17, Japos 12, Ponce 6,  Cañete 6, Monte 3, Cabahug 3, Berandal 2.

J&J Surplus (84) –  Tiwan 20, Oroyan 20, Herra 14, Adolfo 14, Astillero 8, Cabahug 6, Genterolizo 2.

Ikatulong duwa:

RJ Store (57) – Yerro 11, Caparroso 11, Rojo 9, Noynay 8, Sayta 6, A. Pepito 4, Terio 2, Nogas 2, Arocha 2, R. Pepito 2.

DOMZ Autoparts (48) – Godinez 15, Capao 11, Cadampog 9, Bercero 8, Icot 5.