Boc Hitz, Floaters sud semis sa CVBA
CEBU, Philippines — Milampos ang Floaters sa ilang misyon pagsakmit sa luna sa semifinals human makaipsot bitbit ang 76-75 nga kadaogan batok sa Aduana sa kulbahinam nilang duwa sa quarterfinals sa 1st Cebu Vintage Basketball Association (CVBA) basketball tournament niadtong Sabado didto sa Barangay Tinago gym, Dakbayan sa Sugbo.
Mas lisud hinuon ang sunod nga tahas nga sagubangon sa Floaters gumikan kay ang ilang kontrahon sa semis mao man ang 'twice-to-beat' nga Hoopsters.
Si Aladino Labana maoy kuyaw kaayong nakaduwa alang sa Floaters ug gipangulohan ang kadaogan pinaagi sa iyang 19 puntos. Nakatampo sab og dako sa scoring sa Floaters sila si John Mark Jamolin ug Allan Sepe nga nagtampohay og 10 puntos.
Ang Floaters labaw og 15 puntos sa third quarter, apan naalarma sila dihang misikit ang Aduana, 68-70 sa nahibiling 1:12 sa fourth period sa itsa ni Dodong Belarmino nga nakapahinam sa duwa.
Misamot ka kulbahinam ang duwa sa nahibiling mga gutlo dihang nagsinukliay sa ilang opensa ang duha ka kampo.
Matabla unta ni Ronan Cañete ang iskor sa himalatyong segundos apan usa ra ka free throw ang iyang napasud, 73-74.
Gihatagan pa og laing higayon ang Aduana aron makatabla dihang labaw lang og tres puntos ang Floaters, 76-73 sa lay-up ni Michael Villarias, apan mikagar ang 3-point shot ni Geryl Bukiron nga nakapawong sa ilang paglaum.
Anugon kaayo ang 25 puntos ni Sigfred Pastor kay wala kini makapadaog sa Aduana. Si Fraim Oporto mitampo og 15 puntos sa natagak nga koponan.
Dili kaayo maayo ang produksiyon sa usa sa ilang mga sinaligan nga si Baeng Medalle nga igo lang mipupo og tres puntos.
Sa laing aksiyon, miabante sab sa semifinals ang BOC Hitz dihang ilang gilubong ang Avengers, 87-64.
Si Javier Deniega maoy nangu sa upat ka BOC Hitz players nga naka-double figures pinaagi sa iyang 15 puntos. Ang laing tulo mao sila si James Jordan ug Marvin Sillar nga miabuno'g 11 puntos matag usa ug si Noel Medalle nga mitikdol og 10 puntos.
Sangkaon sa BOC Hitz sa semis ang no. 1 nga Portmen nga adunay 'twice-to-beat' advantage.
Ang Avengers gipangulohan ni Reyden Villaronza nga mitali og 18 puntos, gisundan nilang Digoy Solidarios ug Jesus Diano nga parehong mitimbre'g 10 puntos.
Ang liga nga giorganisar ni Roy Canillas gidumala nilang Jun Gayo ug Janno Boniao.
Puntos matag usa
Unang duwa:
BOC Hitz (87) – Deniega 15, Jordan 11, Sillar 11, N. Medalle 10, Marata 7, Ciabo 7, Sigue 6, Dueñas 5, Sagarino 4, Aragon 3, Gayo 3, Engracial 2.
AVENGERS (64) – Villaronza 18, Solidarios 10, Diano 10, Abesia 9, Bensi 4, Cabase 3, Dayon 2, Garcia 2, Amahit 2.
Ikaduhang duwa:
FLOATERS (76) – Labana 19, Jamolin 10, Sepe 10, Arreglo 9, Palad 9, Rama 4, Amante 2, Villarias 2, Agustinez 2, Ibo 2, Alaan 2.
ADUANA (75) – Pastor 25, Oporto 15, Belarmino 8, Bukiron 6, Caburnay 4, Gulbin 3, B. Medalle 3, Taladua 2, Dela Peña, Cañete 1. (BANAT NEWS)
- Latest
