Pacquiao moaway pa'g kaduha o tulo
CEBU, Philippines — Gipadayag ni Manny Pacquiao nga puwede pa siya alang sa duha o tulo ka mga away ug ginganlan niini sila si Terence Crawford, Vasyl Lomachenko o Floyd Mayweather Jr. isip posible niyang mga kontra usa ka adlaw human siya nakasakmit og bag-ong world title.
Ang 39-anyos nga si Pacquiao miitsapuwera na sab sa awhag sa iyang mga higala, apil na si Presidente Rodrigo Duterte nga moretiro na siya sa boksing human gipatikangkang si WBA welterweight champion Lucas Matthysse kay lagi magmagul-anon siya gawas sa ring.
"I feel good for now. Boxing is my passion and I would be lonely if I quit boxing," matud pa ni Pacquiao segun sa taho sa Agence France Presse. "I believe I still have two or three fights left in me."
Si Pacquiao, ang bugtong eight-division world champion sa kasaysayan, mipahilom sa iyang mga kritiko niadtong Domingo didto sa Axiata Arena sa Kuala Lumpur, Malaysia human iyang gipalukapa si Matthysse sa ikapitong hugna aron paglangkat sa ika-12 niyang world title.
Mao kadto ang labing una niyang daog pinaagi sa knockout sukad iyang gipakatulog si Miguel Cotto niadtong 2009.
Si Pacquiao nga nagbitbit na karon og 60-7-2 record, nagkanayon nga iya unang dimdimon ang katam-is sa iyang daog sa dili pa mohimo og negosasyon alang sa sunod niyang away.
Gitataw hinuon ni Pacquiao nga gusto pa siyang mokatkat og balik sa ring sa dili pa matapos ang tuig diin iyang gitiradahan nga sangkaon mao si Amir Khan.
Abli sab si Pacquiao sa posibilidad nga mag-'rematch' sila ni Mayweather.
"If Mayweather comes back to boxing there is a possibility of a rematch," sumala pa ni Pacquiao. "But there are many other challenges, like Crawford, Lomachenko, Amir Khan and many others."
- Latest
