Pacquiao na-TKO si Matthysse sa 7th
Bagong WBA welterweight champion
KUALA LUMPUR-- Ipinakita ng bagong WBA welterweight champion na si Manny Pacquiao ang dati niyang pamatay na porma sa itinalang seventh-round technical knockout win laban kay Lucas Matthysse ng Argentina kahapon sa Axiata Arena rito.
Sinabi ng 39-anyos na si Pacquiao, tatlong beses pinabagsak si Matthysse, na mas naging maingat at pasensyoso siya sa pagkakataong ito.
Tinapos din ng Filipino icon ang pagkauhaw sa pagtatala ng isang knockout victory na huli niyang naiposte noong 2009 nang pigilin si Miguel Cotto sa 12th round sa Las Vegas.
“Our strategy is to be patient and take time. Don’t rush. Don’t be careless like what we did before,” ani Pacquiao sa mga reporters sa post-fight press conference.
Kinailangan ni Pacquiao ng 14 fights para makapaglista ng isang stoppage na ginawa niya laban kay Matthysse, ang hard-punching Argentinian.
Unang pinatumba ni Pacquiao si Matthysse mula sa isang left uppercut sa third round.
Iniskor naman ni Pacquiao ang ikalawa niyang knockdown sa pagtatapos ng fifth canto matapos paluhurin si Matthysse galing sa isang jab na sinundan ng right hook.
Nailigtas ang Argentine ng bell.
Ang matulis na uppercut ni Pacquiao ang tuluyan nang nagpabagsak kay Matthysse sa seventh round.
Ito ang pang-60 panalo ni Pacquiao. (DMaragay)
Related video:
- Latest
