Yap pit-on og bantay sa Barangay Ginebra
CEBU, Philippines — Ramdam na si Rain or Shine Elasto Painters veteran James Yap sa hugot nga depensa nga ipahamtang kaniya sa Barangay Ginebra Kings sa Game 1 sa ilang 'best-of-five' semifinals sa PBA Commissioner's Cup karong gabii didto sa Smart Araneta Coliseum.
Bisan og nag-edad na siya og 36-anyos, si Yap usa gihapon sa mga elite scorers sa liga human siya mirehistro og 27 puntos batok sa GlobalPort Batang Pier sa quarterfinals knockout game.
Si Yap miingon nga kinahanglan siya mohimo og adjustment aron makasud iyang mga tira ilabi na nga sinati na ni Ginebra coach Tim Cone ang iyang duwa. Sila si Cone ug Yap kauban kaniadto sa San Mig Coffee Mixers (karon Magnolia) nga mikulit og grandslam championship niadtong tuig 2014.
"Magaling 'yun eh. Kilalang kilala ko si coach Tim. Pagdating ng playoffs, talagang magaling mag-adjust. Kailangan maging ready kami. Excited ako," matud pa ni Yap sa PBA.com.
Bisan pa og sila ang topseed sa elimination, nagtuo si Yap nga usa sila ka 'underdog' kay ang Ginebra gibitoonan sa mga higante nga sila si Joe Devance, Greg Slaughter ug Japeth Aguilar ug anaa usab kanila ang champion import nga si Justin Brownlee.
- Latest
