Pasay durog sa San Juan
Laro Bukas (Sabado)(University of the Assumption Gym, San Fernando, Pampanga)
5:30 p.m. Marikina vs Zamboanga
7:30 p.m Pampanga vs Parañaque
MANILA, Philippines — Tuluy-tuloy ang pagragasa ng San Juan Knights matapos ilampaso ang Pasay Voyagers, 89-66 upang masungkit ang ikatlong sunod na panalo at angkinin ang solo liderato sa Northern Division sa pagpapatuloy ng 2018 Maharlika Pilipinas Basketball League (MPBL) Datu Cup sa FilOil Flying V Arena sa San Juan City.
Umiskor si Mike Ayon-Ayon ng 16 puntos habang tumulong ng 10 puntos at 14 rebounds ang dating Ginebra player na si John Wilson para sa malaking panalo ng Knights.
Malaki rin ang naitulong nina Aaron Jeruta at Lester Reyes sa kanilang tig-sampung puntos para ipalasap sa Pasay Voyagers ang ikalawang talo sa tatlong laro.
“Sabi ko lang sa mga players, enjoy natin yung game, but at the same time, kailangan dumidepensa tayo at andun pa rin tayo sa sistema. Kung ano yung klaseng depensang ibibigay sa atin, kailangang ready tayo,” ani San Juan coach Randy Alcantara.
Sa ibang laro, nagwagi ang Manila Stars kontra sa Valenzuela Classic, 89-84 para umangat sa 2-1 win-loss kartada sa Northern Division.
- Latest
