Pacquiao mapakyas

CEBU, Philippines — Way gibati nga bisan gamay'ng kahadlok ang Argentinean champion nga si Lucas Matthysse sa nagsingabot niyang pakigsangka ni Pinoy ring icon Manny Pacquiao karong Domingo didto sa Malaysia.

Inay mabalaka tungod kay usa ka legend iyang ikaharung, si Matthysse miingon nga si Pacquiao ang masurprisa sa ilang away tungod kay wala pa kasugat ang Pinoy boxing star og boksidor nga susama kaniya.

"He is a great champion but he still hasn't faced 'The Machine'," matud pa ni Matthysse atol sa final press conference kagahapon nga gitambungan mismo sa boxing legend ug karon promoter nga si Oscar Dela Hoya.

Si Matthysse nagkanayon nga bugtong tahas niya ang madepensaan iyang bakus ug mouli sa Argentina nga usa gihapon ka kampiyon. Salig siya nga mupatigbabaw siya batok ni Pacquiao kinsa posibleng moretiro na kung mapilde pa pag-usab.

Sa iyang bahin, ang conditioning trainer ni Pacquiao nga si Justine Fortune mitug-an nga mas delikado si Matthysse itandi ni Jeff Horn kinsa mipilde ni Pacquiao niadtong miaging tuig pinaagi sa usa ka kontrobersyal nga desisyon.

"This guy Matthysse is a lot better than Jeff Horn, he punches a lot harder," matud pa ni Fortune.

Si Pacquiao nag-atubang og dakung pangutana kung anaa pa ba kaniya iyang kusug human sa 23 ka tuig niya sa sport. Ang 39-anyos nga 'Fighting Senator'  katapusang nakapatumba og kaatbang siyam ka tuig na ang milabay.