Pacquiao solidong suntok ang pakakawalan vs Matthysse

MANILA, Philippines — Sa katunayan, kahit bukas ay maaari nang sagupain ng 39-anyos na si Pacquiao (59-7-2, 38 KOs) ang 35-anyos na si Matthysse (39-4-0, 36 KOs).

“Aggressive, maraming suntok, malalakas, ‘yun ang pakakawalan ko sa ring,” wika ni Pacquiao, nagsasanay sa General Santos City at nakatakdang bumiyahe patungong Kuala Lumpur, Malaysia bukas para sa bakbakan nila ni Matthysse.

Natalo si Pacquiao kay Horn via unanimous decision noong Hulyo ng 2017 kung saan niya naisuko ang dating suot na World Boxing Organization welterweight crown sa Brisbane, Australia.

Sa Hulyo 15 ay pipilitin ni Pacquiao na maagaw kay Matthysse ang hawak nitong World Boxing Association welterweight belt sa Axiata Arena sa Kuala Lumpur.

Lumagpas na sa 135 rounds ang naging sparring ni Pacquiao kina Filipino fighters Arnel Tinampay at Jheritz Chavez at Australian Goerge Kambosos, Jr.

Nauna nang duma­ting sa Kuala Lumpur ang tropa ni Matthysse, umiskor ng isang eight-round TKO win laban kay Teerachai Sithmorseng ng Thailand para angkinin ang bakanteng WBA welterweight belt noong Enero.

Kaagad siyang nag-ensayo kasama si chief trainer Joel Diaz,  ang cornerman ni Timothy Bradley Jr. sa dalawang laban ng retirado nang American champion kontra kay Pacquiao.

Bilang paghahanda ay kumuha si Diaz ng southpaw (kaliwete) sparmate ni Matthysse sa hangaring magamay ang galaw ni Pacquiao.

Huling natalo si Matthysse laban sa isang southpaw noong 2011 matapos makatikim ng split decision loss laban kay American Devon Alexander.