Talisay nakauna sa sibonga

CEBU, Philippines – Daw bagyo ang gipahaguros nga opensa  sa Talisay City Aquastars  sa  fourth quarter  aron lumsan  ang  Sibonga Pillars, 93-70 ug  usa na lang ka daog aron sakmiton ang titulo sa South Division sa 2nd Cebu Governor's Cup Inter-Cities and Municipalities Under-21 Developmental Basketball Tournament niadtong Miyerkules sa gabii didto sa Talisay City Cultural and Sports Complex.

Mahimo nang  tapuson sa Aquastars ang 'best-of-three' series, apan angayan silang mangandam sa usa ka dakong gubat gumikan kay ang Sibonga mao man ang mo-host sa Game 2 karong gabii didto sa Sibonga Sports Complex. Ang Game 3, kon gikinahanglan, duwaon  karong  Hulyo 13 diha sa Cebu Coliseum.

Sa paningkamot nilang Jay Deiparine, Ronan Briones ug Kendrick Abarquez, ang Talisay miposte og 20-16 nga labaw human sa first quarter. Apan ang Sibonga mibawos pinaagi ni Ehman Ronen Suarez nga miposa og 10 sa iyang 12 puntos sa ikaduhang kuwarter ug ingon man si James Nobleza nga midugang og sayes puntos sa maong ratsada hinungdan nga ang mga bisita mao na'y miabante sa halftime, 44-37.

Giinat pa  sa Sibonga ang ilang labaw ngadto sa 51-41, apan ang Talisay napukaw gikan sa lawom nga pagkatug sa ilang opensa aron paglusad og 10-0 run nga maoy nagtabla sa iskor, 51-all sa nahibiling 3:10 sa ikatulong kuwarter.

Padayon hinuon nga miabante ang Pillars, 60-56, apan si Deiparine miabli sa katapusang kuwarter pinaagi sa paglansang og tres nga maoy nagduslit sa  15-0 run nga nakapalabaw sa Talisay sa hingpit, 71-60.

Si Deiparine mihipos og 15 sa iyang 28 puntos sa katapusang kuwarter, si Briones miiskor og 15, si Elmer Echavez mitali og 14 puntos alang sa Talisay nga miinat sa perpekto nilang rekord ngadto sa 11-0.

Si John Bryl Cuyos maoy nangu sa Sibonga uban ang 18 puntos, si Nobleza dunay 14 puntos, si Suarez mitapig og 12 puntos.