Medellin, San Francisco nakauna

CEBU, Philippines – Nagmadaugon ang  Medellin ug San Francisco batok sa tagsa-tagsa nila ka mga kaatbang sa duha ka kulbahinam nga mga duwa nga maoy misugat sa North division semifinals sa 2nd Cebu Governor's Cup Inter-Cities and Municipalities Under-21 Developmental Basketball Tournament niadtong Martes sa gabii didto sa Mandaue City Cultural and Sports Complex.

Siya man tuod maoy labing gamay nga magduduwa sa korte, apan si Gelmart Umpad mipakita og higanteng salida sa dihang iyang gituboy ang Medellin ngadto sa makapakurat nga kadaogan  batok sa kanhi walay pildeng  Consolacion Sarok Weavers, 80-77.

Si Umpad nga kanhi sakop sa University of Cebu (UC) Baby Webmasters, mitagak og 17 sa iyang 23 puntos sa dihang ang Medellin  mibangon human malubong og 11 puntos pagsugod sa katapusang kuwarter, 53-64 aron pagbihag sa Consolacion.

Human sila makatabla, 70-70, si Umpad mao sab ang nakapalabaw sa hingpit sa Medellin, 78-76 sa nahibilin nga 1:42 sa duwa.

Misamot pa ang kalbaryo sa Consolacion sa dihang natawgan og 'unsportsmanlike' foul si Patrick Montaño sa nahibiling 13.6 segundos sa aksiyon.

Sila si Ace Arthur Despi ug John Riel Booc mipasud og tagsa ka free throw nga igo na kaayong nakasalbar sa Medellin.

Miabag ni Umpad mao si Fritz Saladaga nga mihipos og 18 sa iyang 22 puntos sa first half.

Sa sangka tali sa mga taga-isla nga mga basketbolista, si Kenny Rogers Rocacurva mitali og 14 sa iyang 24 puntos sa katapusang kuwarter aron pangulohan ang San Francisco  pagbuntog sa Bantayan Seamasters, 86-82.

Si Rocacurva nakaangkon og igong suporta gikan ni Reynaldo Almacin Jr. nga dunay 17 puntos ug ni Reden Wenceslao nga mitali og 10 puntos.