Phoenix bumangon sa kamalasan
Phelps nagrehistro ng triple-double
MANILA, Philippines — Alam ni import Eugene Phelps na mahalaga ang bawat laro para sa tsansa ng Phoenix na makapasok sa quarterfinal round.
Kumamada si Phelps ng triple-double mula sa kanyang isinumiteng 37 points, 23 rebounds at 10 assists para pamunuan ang Fuel Masters sa 135-108 paggiba sa Globalport Batang Pier sa 2018 PBA Commissioner’s Cup kahapon sa Smart Araneta Coliseum.
“We got the win and that’s all that really matter,” sabi ni Phelps sa pagpigil sa apat na sunod na kamalasan ng Phoenix. “We got a good team. Everybody stepped up.”
Nagdagdag sina Matthew Wright, rookie Jason Perkins at RJ Jazul ng 24, 13 at 11 markers, ayon sa pagkakasunod, para sa 4-6 baraha ng Fuel Masters.
Binanderahan naman ni reinforcement Malcolm White ang Batang Pier, may 4-5 marka, mula sa kanyang 24 points.
Ito ang unang laro ng Phoenix matapos ibigay si veteran shooter Jeff Chan sa Barangay Ginebra kamakalawa kapalit ng isang first-round pick sa 2018 PBA Rookie Draft.
Nabaon ang Globalport sa halftime, 51-70, hanggang maiwanan sa 36-point deficit, 61-97, sa huling 3:28 minuto ng third quarter.
Nag-ambag si Sean Anthony ng 15 markers para sa Batang Pier kasunod ang 14 points ni Stanley Pringle.
Samantala, muling pumasok sa trade ang Ginebra makaraang ibigay si guard Paolo Taha sa Globalport kapalit ni small forward Julian Sargent.
Kasalukuyan pang naglalaro ang Gin Kings at Columbian Dyip habang isinusulat ito.
- Latest
