Solidong line-up ipaparada ng Taiwan vs Gilas Pilipinas
MANILA, Philippines — Habang halos walang nabago sa line-up ng Gilas Pilipinas ay nagpalakas naman nang husto ang Chinese-Taipei para sa third window ng 2019 FIBA World Cup Asian Qualifiers.
Kinuha ni seasoned tactician Chou Chun-San para sa Taiwan si 6'8 Under 17 star big man Jonah Morrison para makatuwang nina Chiang Yu-An, Chou Yi-Hsiang, Hu Long-Mao at Chen Ying-Chun. Hu.
Makakasama nila ang 2018 Super Basketball League (SBL) MVP na si Lu Cheng-Ju at si 2018 SBL Champions Series MVP at naturalized player Quincy Davis, nagposte ng mga averages na 6.8 points, 9.0 rebounds, 2.3 blocks at 2.0 steals per game sa Asian Qualifiers.
Lalabanan ng Gilas Pilipinas, ibabanderang muli nina naturalized center Andray Blatche at four-time PBA MVP June Mar Fajardo, ang Taiwan sa Hunyo 29 sa Taipei Heping Basketball Gymnasium.
Sa Hulyo 2 ay haharapin ng Nationals ang Australia, itatampok sina NBA players Matthew Dellavedova at center Thon Maker sa Philippine Arena sa Bocaue, Bulacan.
Bumabandera ang Australia sa Group B tangan ang 4-0 record kasunod ang Pilipinas (3-1), Taiwan (1-3) at Japan (0-4).
Tinalo ng Gilas Pilipinas ang Japanese, 77-71 noong Nobyembre 24 at isinunod ang Taiwan, 90-83 noong Nobyembre 27 bago natalo sa Australia, 68-84 noong Pebrero 22.
Kinuha ng Gilas ang ikatlong panalo matapos ulitan ang Japan, 89-84 noong Pebrero 25.
- Latest
