President’s Cup boxingfest: Suarez abante sa 2nd roundo

MANILA, Philippines — Nagrehistro si Asian Games silver medalist Charly Suarez ng pahirapang panalo sa second round upang makasiguro ng tiket sa quarterfinals ng 2018 President’s Cup International Boxing Tournament na ginaganap sa Daulet Sports Complex sa Astana, Kazakhstan.

Kinailangan ni Suarez na ibuhos ang kanyang lahat  ng alas bago kubrahin ang 3-2 panalo kontra kay Hursand Imankuliyev ng Turkmenistan sa second round ng men’s lightweight (60 kg.).

Ibinigay kay Suarez ang 29-28 iskor ng tatlong huradong pumabor sa Pinoy boxer mula sa dalawang Kazakhstan judges (Kazin at Zhumankulov), at mula Tajikistan (Umarov) habang nakuha ni Imankuliyev ang boto ng Indian (Farkhad) at Russian (Radnaev) na may magkatulad na 29-28.

Sasagupain ni Suarez sa quarterfinals si Shunkor Abdurasulov ng Uzbekistan na nagtala ng 4-1 panalo kontra kay Sur Toltayev ng Kazakhstan sa hiwalay na second-round bout.

Nakatakda ring sumabak si Caroline Calungsod kontra kay Jitpong Jutamas ng Thailand sa opening round ng women’s 57 kg. Huwebes ng gabi.

Susuntok ngayong araw sina 2017 Southeast Asian Games champion Marvin John Tupas (men’s light heavyweight – 81 kg.) at Jeorge Edusma (men’s bantamweight - 56 kg.)

Makakalaban ni Tupas Nurmagambet Bi ng Kazakhstan na umiskor ng 5-0 unanimous decision kay Chen Daxiang ng China habang lalarga si Edusma kontra kay Xu Boxiang ng China.