Blazers ikakasa ang q’finals
MANILA, Philippines — Papanain ng College of St. Benilde ang unang tiket sa quarterfinals sa pakikipagtipan nito sa Adamson University ngayong hapon sa pagpapatuloy ng 12th FilOil Flying V Preseason Cup sa The Arena sa San Juan City.
Haharapin ng Blazers ang mapanganib na Soaring Falcons sa alas-4:30 ng hapon habang magtutuos naman ang Ateneo De Manila University at National University sa alas-7 ng gabi.
Hawak ng Benilde ang solong liderato sa Group B tangan ang imakuladang 5-0 baraha.
Halos dalawang linggo ring napahinga ang Blazers.
Tinalo nito ang University of Santo Tomas, 99-87 may siyam na araw na ang nakalilipas kung saan nangibabaw sina Clement Leutcheu, Edward Dixon at JJ Domingo.
Isang panalo na lamang ang kailangan ng Blazers para awtomatikong masikwat ang silya sa quarterfinals.
Sa kabilang banda, puntirya ng Ateneo na makisalo sa liderato sa Group A kasama naman ang La Salle (5-0).
Mas matagal na napahinga ang reigning UAAP champions Ateneo. (CCo)
- Latest