San Miguel modaog na kaha?

CEBU, Philippines – Likayan sa San Miguel Beermen ang usa unya sa labing ngil-ad nilang sugod sa conference sa ilang sangka batok Phoenix Fuel Masters karong gabii didto sa  Smart Araneta Coliseum.

Ang San Miguel ug Phoenix magsangka sa alas-7 sa gabii human sa duwa tali sa Blackwater Elite ug NLEX Road Warriors.

Ang Beermen wala pa'y daog sa unang tulo nila ka duwa bisan pa sa lig-on nilang line-up, apan si coach Leo Austria masaligon nga masanta na ang ilang demalas karon.

Kun adunay gusto kaayo modaog, kini mao ang import sa San Miguel nga si Renaldo Balkman. Ang ABL champion import mipuntos og 32, apan dili kini igo aron tagayan ang    Beermen sa una  niining daog kay napilde sila sa Alaska Aces.

Si   Balkman  uban sa    star   bigmen nga sila  si  JuneMar Fajardo,   Arwind   Santos ug Christian Standhardinger tuyo nga mogamit sa ilang gidak-on batok sa Phoenix nga  laraw sab moinat sa ilang rekord ngadto sa 4-2.

Bisan  og biya sila sa gidak-on, kompiyansa si Phoenix coach Louie Alas nga modaog sila gamit ilang outside shooting sa pagpangulo nila ni Matthew Wright ug Jeff Chan.