Gob lumayas na rin sa La Salle

MANILA, Philippines — Isa pang De La Salle University player ang nagtawid bakod patungong University of the Philippines.

Sumama na si dating La Salle standout J-Boy Gob sa rigodon nang magpasya itong lumipat sa kampo ng Fighting Maroons.

Pormal nang inihayag kahapon ni UP head coach Bo Perasol ang paglipat ni Gob matapos ang panalo ng Fighting Maroons kontra sa Emilio Aguinaldo College (83-70) sa 12th FilOil Flying V Preseason Cup sa The Arena sa San Juan City.

“He (Gob) is a welcome addition to our program. I really think that he is a guy full of talent. Bu he needs that opportunity to showcase what he has,” wika ni Perasol.

Nauna nang lumipat si Ricci Rivero noong nakaraang linggo.

Parehong sasailalim sina Gob at Rivero sa residency bago tuluyang suotin ang jersey ng UP sa UAAP Season 82.

Ang 6-foot-5 na si Gob ay may averages na 14.9 points at 15.1 rebounds sa La Salle Greenhills noong naglalaro pa ito sa juniors division.

Naglaro bilang rookie si Gob para sa Green Archers noong Season 78 subalit nagtamo ito ng ACL injury para mapahinga sa mga sumunod na taon.

Ibinaba si Gob sa Team B ng La Salle kamakailan dahilan upang magpasya na itong lisanin ang Taft-based squad.

Sa pagpasok nina Gob at Rivero, mas mapapalakas nito ang Fighting Maroons kasama sina Bright Akhuetie, Javi Gomez de Liaño, Juan Gomez de Liaño, Will Gozum, Jun Manzo, David Murell at Jaydee Tungcab.