PBA All-Star Game sa Davao kasado na
MANILA, Philippines — Sasakupin ng PBA ang Luzon, Visayas at Mindanao para sa pagdaraos ng taunang All-Star Game.
Bibisita ang PBA sa pangunguna ni Commissioner Willie Marcial at ang mga delegates at officials kasama ang mga miyembro ng Mindanao All-Star at Smart All Star Philippine team sa Digos, Davao del Sur simula bukas para sa kickoff leg ng mid-season classic.
Magtutuos ang Mindanao team at ang Smart All-Stars sa alas-7:30 ng gabi sa Davao del Sur Coliseum.
Ang national team ay gagabayan ni Norman Black ng Meralco habang ang Mindanao selection ay hahawakan ni Barangay Ginebra coach Tim Cone.
Bago ang laro ay idaraos muna ang Legends shootout na tatampukan ng apat na shooting tandems nina Allan Caidic/Secretary Bong Go, Kenneth Duremdes/Senator Manny Pacquiao, Peter June Simon/Presidential son-in-law Mans Carpio at Scottie Thompson/Major Michael Sabsal.
Si Governor Mark Cagas ang magiging special guest para sa initial leg ng three-phase event.
“It's an honor and privilege to be the host of the 2018 All-Star game opener. We hope to give PBA fans a treat and set the perfect stage for another exciting week of basketball ahead,” wika ni Cagas.
Mula sa Davao ay bibiyahe ang delegasyon sa Batangas City para sa second leg sa Mayo 25.
Maghaharap ang Luzon team ni Leo Austria ng San Miguel at ang national squad ni Yeng Guiao ng NLEX sa alas-7 ng gabi sa Batangas City Coliseum na tatampukan ng skills competitions kagaya ng Obstacle Challenge, Three-Point shootout, Slam Dunk at Shooting Stars.
Magtatapos ang All-Star week sa Iloilo City sa Mayo 27 sa pagsagupa ng Visayas ni team Magnolia coach Chito Victolero sa Philippine squad ni Nash Racela ng TNT Katropa sa San Agustin gym.
- Latest