Sogod pilde tungod sa uniporme

CEBU, Philippines — Andam na unta sila nga moposte sa una nilang daog atubangan sa ilang mga katagilungsod.

Apan sa wala damha nga hitabo, nahimong kataw-anan ang nadangatan sa Team Sogod.

Gikatakda unta sila nga mo-host ug lagmit mopatigbabaw batok sa huyang nga kontra apan ang Sogod na-forfeit gumikan sa pagdala og sayop nga uniporme atol sa ilang duwa batok sa Tudela sa 2nd Cebu Governor's Cup 2018 Inter-Cities and Municipalities Under-21 Developmental Basketball Tournament niadtong Sabado sa gabii didto sa Sogod municipal gym.

Mao kadto ang ikaduhang sagunson nga pilde sa Sogod, samtang ang Tudela, nga lab-as pang gilubong og 60 puntos sa San Francisco, miputol sa duha ka sunod-sunod nilang pilde nga wala gani makapatulo bisan og usa ka lugas nga singot.

Sa laing duwa ubos sa North Division Bracket 2, ang Poro mi-angkon sa ikaduha nilang daog human gibuntog ang Catmon, 83-76.

Sila si Rod Ryan Digal ug Mhar Nino Florentino maoy nangu sa Poro pinaagi sa pagkumboya og 48 puntos. Miabag kanila si Jhom Jake Lucernas nga dunay 11 puntos.

Si Don Kobe Bryll Cole maoy nangu sa Catmon uban ang 11 puntos, samtang sila si Jose Jade Amaga ug Ronel Sumalinog mitali og 10 puntos matag usa sa pilderong kawsa. (FREEMAN)