High Jumper unang naka-gold sa Cebu City

CEBU, Philippines — Ang Sugbuanang si Roneth Ayuda maoy unang nimina og bulawang medalya sa Team Cebu City sa athletics event sa Philippine National Games (PNG) 2018 kagahapon diha sa Cebu City Sports Center.

Ang 21-anyos nga si Ayuda maoy nanghawod sa women’s high jump human gilayat ang distansiya nga 1.50 metros. Iyang gilupig ang teammate niyang si Kristy Kay Vinco ug ang taga-Baguo nga si Lyka Casta, nga maoy nakakuha sa silver ug bronze sa distansiya nga 1.40m.

“I’m just inspired to compete before by friends and family,” matud pa ni Ayuda, nga nakasakmit og gold sa katapusang duha ka edisyon sa  Private Schools Athletic Association (PRISAA) National Games didto sa Zambales ug Tagbilaran, Bohol.

Si Ayuda, nga lumad gikan sa Liloan, Cebu, mipahinungod sa iyang daog ngadto sa iyang amahan nga si Rommel, nga manglimpyo og ad sa baboy, mo-drayb og ‘habal-habal’ ug motabang og ani og mangga aron lamang duna silay kapanginabuhian.

“This is for my father, who works hard for us,” dason pa ni Ayuda nga kahilakun. Ang iyahang inahan mipanaw gumikan sa kanser walo na ka tuig ang milabay sa dihang nag-edad pa siya og 13 anyos.

Sa wala pa mo-asdang sa labing una niyang PNG, si Ayuda nagkanayon nga giataki siya og balik sa iyang hubak hinungdan nga nag-undang siya og training sud sa usa ka semana.

Apan inay magluya, gihimo kini niyang inspirasyon aron makahatag og kadungganan sa mga Sugbuanon ning usa ka semanang kompetisyon.

Taliwala sa iyang kalampusan, si Ayuda nagdamgo nga malakip sa national team sa umaabot.

“It is my dream to join the national team and to compete in various international competitions, and I am hoping to be part those who will be selected,” batbat pa ni Ayuda. (FREEMAN)