Cavaliers miresbak sa Celtics
CEBU, Philippines — Si LeBron James miratsada og 27 puntos ug 12 ka assists ug si Kevin Love midugang og 14 ka rebounds sa dihang ang Cleveland Cavaliers nagmangtas didto sa ilang korte aron ilampaso ang Boston Celtics, 116-86, sa Game 3 sa ilang best-of-seven NBA Eastern Conference finals kagahapon didto sa Quicken Loans Arena sa Cleveland, Ohio.
Naglabaw pa hinoon gihapon ang Celtics, 2-1, apan mahimong tablahon sa Cavs ang serye sa ila unyang pag-host sa Game 4 karong Martes.
Dominante kaayo ang Cavs gikan sa pagsugod ug wala na molingi pa human milabaw og 19 puntos sa unang kuwarter.
Misamot pa og kabangis ang Cavs sa second half diin ilang gilubong og 30 puntos ang nagkagidlay nga Celtics.
Dako sab og natampo si Kyle Korver nga miposa og upat sa 17 ka 3-pointers sa Cavs.
Gawas nilang James ug Korver, lain pang upat ka Cavs ang mikadlit og double figures. Sila si George Hill ug J.R. Smith nagkumboya og 24 puntos agi'g timaan sa balanse nilang ataki.
Sa habig sa Celtics, si Jaylen Brown na-foul trouble ug igo lamang mihipos og 10 puntos.
Si Jayson Tatum mi-iskor og 18 ug si Terry Rozier dunay 13 sa Boston.
Taas pa hinoon ang baktason sa Cavs kay kinahanglan nilang usbon og suwat ang kasaysayan aron kab-oton ang ilang tinguha nga makataak sa NBA Finals sa ikaupat nga sunod-sunod nga higayon.
Kini gumikan kay ang Celtics nagbitbit man og 37-0 record sa higayon nga sila modaog sa nag-unang duha ka duwa sa usa ka serye.
Wala hinoon mabalaka niini si Cavs coach Tyronn Lue.
"That doesn't bother me. The games have to be played. They won two games on their home court, which we know they've been playing well the whole playoffs, but we're not discouraged,” dason pa ni Lue. (BANAT NEWS)
- Latest
